Një sondazh ndërkombëtar ka zbuluar se si i vlerësojnë operatorët turistikë turistët nga vende të ndryshme të botës, duke i ndarë ata sipas sjelljes, bakshisheve, shpenzimeve, aventurës dhe interesit për gastronominë.
Sipas të dhënave të publikuara nga SafariBookings, platformë online e specializuar në udhëtimet safari në Afrikë, në sondazh morën pjesë 192 operatorë turistikë. Ata u pyetën se cilat kombësi dallohen më shumë në secilën prej pesë kategorive.
Japonezët, turistët më të sjellshëmNë kategorinë e mirësjelljes, Japonia renditet e para, me 21.1% të vlerësimeve. Pas saj vijnë Norvegjia me 10.6% dhe Zvicra me 10.4%.
Në listë pasohen nga Kanadaja, SHBA-ja, Polonia dhe Holanda. Në fund të renditjes për këtë kategori ndodhet Italia, me vetëm 1.3% të vlerësimeve.
Amerikanët kryesojnë për bakshishetKur bëhet fjalë për bakshishet, renditja ndryshon ndjeshëm. Turistët amerikanë janë ata që vlerësohen si më bujarët, duke marrë 29.5% të përgjigjeve.
Pas tyre renditen gjermanët me 13.1%, kanadezët me 10% dhe zviceranët me 8.6%.
Amerikanët dalin në krye edhe sa i përket shpenzimeve gjatë udhëtimeve. Ata morën 24% të vlerësimeve, ndërsa Gjermania dhe Kanadaja ndajnë vendin e dytë me nga 12.8%.
Gjermanët, më aventurierëtPër turistët që kërkojnë më shumë aventura dhe aktivitete gjatë pushimeve, kryeson Gjermania, me 21.1%.
Në vendin e dytë renditet Franca me 17.8%, ndërsa Holanda është e treta me 11%. SHBA-ja renditet e katërta me 9.5%.
India kryeson te gastronomiaNjë tjetër kategori e sondazhit lidhet me interesin për ushqimin dhe gastronominë lokale.
Këtu kryeson India, me 18.7% të vlerësimeve, ndërsa Japonia renditet e dyta me 17.5%. Franca është në vendin e tretë me 12.4%, e ndjekur nga Kina me 12.3%.
Rezultatet tregojnë se nuk ekziston një kombësi që dominon në të gjitha kategoritë. Japonezët vlerësohen veçanërisht për mirësjelljen, amerikanët për bakshishet dhe shpenzimet, gjermanët për aventurën, ndërsa turistët indianë për interesin ndaj ushqimit vendas.
Sipas SafariBookings, rezultatet bazohen në perceptimet e operatorëve turistikë të përfshirë në sondazh dhe pasqyrojnë eksperiencat e tyre me turistët, jo një matje absolute të sjelljes së çdo individi të një kombësie.