Agjenti legjendar James Bond, i njohur në mbarë botën si 007, mund të jetë një prej personazheve më të famshëm të letërsisë dhe kinematografisë, por historia e tij ka rrënjë shumë më reale nga sa mund të mendohet. Pas aventurave, identiteteve të fshehta dhe misioneve të rrezikshme të agjentit britanik qëndrojnë histori të vërteta spiunazhi dhe figura që shkrimtari Ian Fleming kishte njohur gjatë jetës së tij.
Fleming, i cili gjatë Luftës së Dytë Botërore shërbeu në Departamentin e Inteligjencës Detare të Marinës Mbretërore britanike, pati mundësinë të njihej nga afër me botën e operacioneve sekrete. Përvojat e kësaj periudhe dhe kontaktet me agjentë të ndryshëm u kthyen më vonë në një burim frymëzimi për universin e James Bond.
Mes dhjetë figurave që lidhen me krijimin e personazheve të famshëm të sagës përmenden emra si Sidney Reilly, Dusko Popov, Wilfred Dunderdale dhe Christine Granville. Disa prej tyre konsiderohen modele të mundshme për vetë 007, ndërsa të tjerë kanë shërbyer si frymëzim për personazhe të tjera, përfshirë shefin M, Vesper Lynd dhe specialistin e pajisjeve Q.
Një nga figurat më intriguese është Dusko Popov, agjent i dyfishtë gjatë Luftës së Dytë Botërore. Ai punonte për inteligjencën britanike, ndërsa ruante lidhje edhe me shërbimet gjermane. Sipas historive që kanë qarkulluar për marrëdhënien e tij me Flemingun, të dy janë takuar në një kazino në Portugali. Episodi ka tërhequr vëmendje të veçantë, pasi loja e bixhozit zë një vend të rëndësishëm në romanin e parë të Bond, “Casino Royale”.
Një tjetër emër i rëndësishëm është Maxwell Knight, drejtues i inteligjencës britanike, i cili nga disa biografë është konsideruar si një prej modeleve të mundshme për personazhin M, shefin e James Bond. Ndërkohë, Charles Fraser-Smith, i cili prodhonte pajisje të posaçme dhe mjete të fshehta për agjentët britanikë, lidhet me frymëzimin për personazhin Q, përgjegjësin e teknologjisë dhe pajisjeve speciale të 007.
Në listën e figurave që kanë ndikuar në universin e Bond përfshihen gjithashtu Sidney Reilly, spiuni britanik me origjinë ruse, oficeri i inteligjencës Wilfred Dunderdale dhe agjentja e njohur e SOE-së, Christine Granville. Kjo e fundit u bë e njohur për misionet e saj të rrezikshme gjatë luftës dhe konsiderohet një nga gratë që mund të kenë ndikuar në krijimin e personazheve femërore të sagës.
Emra të tjerë që përmenden janë Fitzroy Maclean, Betty Pack, William Stevenson dhe John Godfrey. Ky i fundit kishte drejtuar inteligjencën detare britanike dhe ishte një prej eprorëve me të cilët Fleming kishte bashkëpunuar gjatë luftës.
Megjithatë, lidhjet mes këtyre personave dhe personazheve të librave nuk janë të gjitha të konfirmuara nga vetë autori. Fleming kishte shpjeguar se James Bond ishte një përzierje e agjentëve sekretë dhe komandove që kishte njohur gjatë shërbimit të tij ushtarak, duke i dhënë personazhit tipare të ndryshme nga njerëz realë.
Romani i parë, “Casino Royale”, u botua në vitin 1953 dhe shënoi fillimin e një prej sagave më të suksesshme të spiunazhit. Që prej asaj kohe, James Bond është kthyer në një ikonë të kulturës popullore, ndërsa historia e njerëzve që mund të kenë frymëzuar krijimin e tij dëshmon se, në disa raste, realiteti i botës së spiunazhit mund të jetë po aq intrigues sa vetë filmat.

