Lajme Zone
Xhensila Myrtezaj përfundon në gjyq për evazion fiskal, dyshohet se fshehu mbi 60 milionë lekë të ardhura
EkonomiGazeta Tema
Ky artikull është pjesë e një historie me 6 burime — Krahaso mbulimin →

Xhensila Myrtezaj përfundon në gjyq për evazion fiskal, dyshohet se fshehu mbi 60 milionë lekë të ardhura

Prokuroria e Tiranës ka përfunduar hetimet dhe ka dërguar për gjykim këngëtaren Xhensila Myrtezaj, e cila akuzohet për veprën penale të fshehjes së të ardhurave, të kryer më shumë se një herë.

Prokuroria e Tiranës ka përfunduar hetimet dhe ka dërguar për gjykim këngëtaren Xhensila Myrtezaj, e cila akuzohet për veprën penale të fshehjes së të ardhurave, të kryer më shumë se një herë.

Sipas njoftimit zyrtar të Prokurorisë, hetimet kanë zbuluar dyshime për shmangie të detyrimeve tatimore gjatë viteve 2023 dhe 2024, në një vlerë totale prej 6.075.521 lekësh të reja.

Nga akti i ekspertimit kontabël rezulton se për vitin 2023, këngëtarja dyshohet se ka shmangur detyrime tatimore në vlerën 2.417.311 lekë, ndërsa për vitin 2024 shuma arrin në 3.658.210 lekë.

Prokuroria bën me dije se gjatë hetimeve janë evidentuar transaksione për pasuri të paluajtshme me burime të pajustifikuara financiare, depozitime të konsiderueshme parash cash që nuk përputheshin me të ardhurat e deklaruara, si dhe tërheqje të konsiderueshme për të cilat nuk kishte informacion mbi mënyrën e përdorimit.

Për të justifikuar depozitimet në para fizike, Xhensila Myrtezaj ka deklaruar se të ardhurat vinin nga koncertet e zhvilluara brenda dhe jashtë Shqipërisë. Megjithatë, sipas Prokurorisë, dokumentacioni i paraqitur për të mbështetur këto pretendime ka justifikuar vetëm një pjesë të shumave.

Në përfundim të hetimeve, organi i akuzës ka arritur në përfundimin se fshehja e të ardhurave është kryer në dy vite të ndryshme kalendarike dhe si rrjedhojë e ka dërguar çështjen për gjykim, për veprën penale të parashikuar nga neni 180/1 i Kodit Penal.

Njoftimi i prokurorisë:

Fshehu të ardhurat më shumë se një herë duke shkaktuar mbi 6 milionë lekë evazion fiskal, Prokuroria e Tiranës dërgon në gjyq shtetasen Xh.K.

Prokuroria pranë Gjykatës së Shkallës së Parë të Juridiksionit të Përgjithshëm, Tiranë, përfi hetimet dhe dërgon në gjyq shtetasen Xh.K., akuzuar për veprën penale ‘Fshehje e të ardhurave’ konsumuar më shumë se një herë parashikuar nga neni 180/1 i Kodit Penal.

Në përfundim të hetimeve mbi procedimit penal nr.5824/ 2024, në analizë të të gjithë informacioneve, verifikimeve dhe veprimeve hetimore të kryera, rezultoi se ka dyshime të arsyeshme se shtetasja Xh.K., është implikuar në kryerjen e veprës penale “Fshehja e të ardhurave”, parashikuar nga neni 180 i K.Penal, pasi rezulton e përfshirë në transaksione me pasuri të paluajtshme me burime të pajustifikuara fondesh, depozitime të konsiderueshme “cash” të cilat nuk justifikohen nga të ardhurat e deklaruara prej tyre, si dhe tërheqje të konsiderueshme “cash” për të cilat nuk ka informacion mbi mënyrën e përdorimit. Për të justifikuar derdhjet cash shtetasja Xh.K., ka dorëzuar një letër të thjeshtë ku deklaron se ka gjeneruar të ardhura nga koncertet brenda dhe jashtë vendit, por ato justifikohen vetëm pjesërisht.

Nga tërësia e akteve të administruara si dhe referuar aktit të ekspertimit kontabël, provohet se e pandehura Xh.K., për vitin 2023, ka shmangur nga detyrimi tatimor (evazion fiskal) e llogaritur nga eksperti shumën totale 2 417 311 Lek. Ndërsa për vitin 2024, ka shmangur nga detyrimi tatimor të llogaritur nga eksperti shumën totale 3 658 210 Lek.

Nga Prokuroria pranë Gjykatës së Shkallës së Parë të Juridiksionit të Përgjithshëm, Tiranë u provua se nga e pandehura është realizuar shmangia nga detyrimi tatimor në dy vite të ndryshme kalendarike të veçanta, ku secili vit përmban fshehjen e qëllimshme të të ardhurave, e në këto rrethana veprat penale janë kryer të pavarura me njëra-tjetrën.

Sa më sipër në bazë të akteve të administruara dhe te analizuara provohet se shtetasja Xh.K., ka konsumuar veprën penale “Fshehje e të ardhurave” dy herë, parashikuar nga neni 180/1 i K. Penal dhe çështja në ngarkim të saj dërgohet për gjykim.