Izraeli voton më 27 tetor, në zgjedhje ku debati do të dominohet nga përgjegjësitë për sulmin e 7 tetorit, luftërat në disa fronte, shërbimi ushtarak i hebrenjve ultra-ortodoksë dhe rritja e kostos së jetesës. Përgjegjësia për dështimin në parandalimin e sulmit të Hamasit më 7 tetor 2023 është një nga çështjet kryesore të zgjedhjeve izraelite.
Opozita kërkon ngritjen e një komisioni të pavarur shtetëror, ndërsa qeveria e Benjamin Netanyahut propozon një komision dypartiak, anëtarët e të cilit do të emërohen nga politika.
Kryeministri përballet gjithashtu me kritika për politikën e mëparshme ndaj Katarit, financues i rëndësishëm i Hamasit. Fushata pritet të përqendrohet edhe te strategjia e sigurisë.
Pas 7 tetorit, Izraeli është përfshirë në operacione të zgjatura në Gazë, Liban, Siri, Bregun Perëndimor, Iran dhe Jemen. Mobilizimi i përsëritur i rezervistëve ka sjellë mungesa personeli dhe kosto të larta ekonomike.
Një tjetër përplasje lidhet me përjashtimin nga shërbimi ushtarak të studentëve ultra-ortodoksë. Partitë fetare dhe Likud-i kërkojnë ruajtjen e përjashtimeve, ndërsa shumica e opozitës mbështet rekrutimin e tyre.
Pavarësisht rritjes ekonomike dhe papunësisë së ulët, Izraeli ka një nga kostot më të larta të jetesës. Mungesa e banesave, konkurrenca e kufizuar dhe dyfishimi i buxhetit të mbrojtjes që prej vitit 2023 po shtojnë presionin mbi familjet dhe financat publike. Top Channel