Është e rëndësishme që veshët të ajrosen mirë, pasi në të kundërt, lagështia mund të rrisë rrezikun e infeksioneve të kanalit të veshit. Nëse jeni të prirur ndaj infeksioneve të tilla dhe përdorni kufje, mjekët këshillojnë që të mendoheni mirë përpara se të zgjidhni një model.Lexo edhe:Vitamina B12, shpresë për një sëmundje të rrallë gjenetike, shkencëtarët zbulojnë efektin befasues Specialisti i veshit, hundës dhe fytit (ORL), Thomas Deitmer, këshillon shmangien e kufjeve që mbulojnë plotësisht veshët, nëse keni veshë të ndjeshëm. Kupat e këtyre kufjeve mbulojnë plotësisht veshin e jashtëm. “Kjo bën që kanali i veshit të ngrohet dhe të krijohet gjithnjë e më shumë lagështi. Ky është një mjedis i favorshëm për zhvillimin e baktereve”, thotë ai. Nëse mikrobet shumohen me shpejtësi, mund të shfaqet një infeksion. Sipas tij, kufjet që vendosen mbi vesh, të cilat janë më të vogla se modelet që e mbulojnë plotësisht atë, janë më të sigurta. Ato vendosen mbi pjesën e jashtme të veshit dhe lejojnë qarkullim më të mirë të ajrit. E njëjta gjë vlen edhe për kufjet që futen në vesh dhe që qëndrojnë relativisht lirshëm. Situata është ndryshe me modelet që kanë maja silikoni dhe përshtaten ngushtë në kanalin e veshit. “Kjo krijon një mjedis të lagësht, duke e bërë më të lehtë zhvillimin e inflamacionit”, thotë ai. Këshilla e Deitmerit, veçanërisht në rastet kur shfaqen probleme apo edhe rrjedhje lëngjesh nga veshi, është: “Reduktoni kohën e përdorimit të kufjeve dhe lejoni që ajri të qarkullojë rreth veshëve”. Gjithashtu, është e rëndësishme që kufjet të pastrohen rregullisht. Më e mira është të ndiqni udhëzimet e prodhuesit. Po tapët e veshëve? As tapët e veshëve nuk duhet të përdoren, thotë specialisti ORL Bernhard Junge-Hülsing. Një nga arsyet është se ato e shtyjnë dyllin e veshit më thellë brenda kanalit. “Përjashtim bëjnë rastet kur shkoni në një koncert me zhurmë të lartë ose kur ka zhurmë të padurueshme në dhomën e hotelit. Por përdorimi i tyre nuk duhet të kthehet në zakon”. Ai thotë se kjo vlen veçanërisht për ata që i përdorin çdo natë, sepse partneri i tyre gërhet. Këshilla e tij? “Do të ishte më mirë ta dërgonit partnerin te një specialist ORL për të zbuluar shkaqet e gërhitjes”./DPA News

