Ferran Torres ka nisur zyrtarisht një kapitull të ri në karrierë. Sulmuesi spanjoll është prezantuar si futbollisti më i ri i Paris Saint-Germain, pas përfundimit të transferimit nga Barcelona.
Klubi francez ka zyrtarizuar marrëveshjen në rrjetet sociale, ndërsa Barcelona ka konfirmuar gjithashtu largimin e 26-vjeçarit. Transferimi është mbyllur për një shifër rreth 50 milionë euro, ndërsa Torres ka firmosur kontratë me PSG-në deri në vitin 2031.
Largimi nga Barcelona vjen pas katër vitesh e gjysmë në “Camp Nou”. Gjatë kësaj periudhe, Torres zhvilloi 207 ndeshje dhe shënoi 65 gola, duke kaluar nga një rol kryesisht në krahët e sulmit në një pozicion më të avancuar si qendërsulmues.
Dy sezonet e fundit nën drejtimin e Hansi Flick ishin veçanërisht produktive për spanjollin. Torres realizoi 40 gola në të gjitha kompeticionet, me 19 gola në sezonin 2024-25 dhe 21 në sezonin 2025-26.
Por kjo verë ka qenë edhe më speciale për të. Më 19 korrik, Torres shënoi golin vendimtar që i dha Spanjës titullin e dytë botëror, përpara se vetëm pak javë më vonë të zyrtarizonte transferimin te kampionët e Evropës.
Në Paris, megjithatë, Torres nuk do ta ketë të lehtë të fitojë një vend titullari. PSG ka një repart ofensiv të mbushur me yje, ku spikasin Ousmane Dembélé, Khvicha Kvaratskhelia dhe Désiré Doué, ndërsa klubi ka shtuar edhe alternativa të tjera në sulm.
Një tjetër faktor i rëndësishëm është trajneri. Torres do të punojë sërish me Luis Enriquen, me të cilin ka bashkëpunuar edhe te kombëtarja spanjolle.
Pas 207 ndeshjesh dhe 65 golash me Barcelonën, Ferran Torres i jep fund aventurës në Katalonjë dhe nis një sfidë të re në Francë.
Nga “Camp Nou” në “Parc des Princes” – Torres tashmë është zyrtarisht pjesë e PSG-së.