Projekt-rregullorja parashikon ndërprerjen e furnizimit për familjet në nevojë që nuk respektojnë marrëveshjet e pagesës, por vendos edhe masa mbrojtëse. ERE ka nisur konsultimin publik dhe ende nuk i ka miratuar ndryshimet përfundimtare. Enti Rregullator ka hartuar rregulla të reja për ndërprerjen e furnizimit me energji elektrike të familjeve në nevojë. Dokumenti, të cilin ERE e publikoi për konsultim më 3 nëntor 2026, përcakton kushtet kur furnizuesi mund t'u ndërpresë dritat familjeve që nuk përmbushin detyrimet e pagesës, procedurat që duhet të ndjekë dhe rastet kur ligji e ndalon ndërprerjen.
Projekt-rregullorja mbështetet te ligji nr. 59/2026, “Për sektorin e energjisë elektrike”, dhe synon të përshtatë procedurat me kuadrin e ri ligjor. Bordi i ERE-së e miratoi dokumentin si projekt më 26 tetor, ndërsa më 3 nëntor e nxori për konsultim publik. Rregullat e propozuara nuk kanë hyrë ende në fuqi.
Sipas dokumentit, një familje që ka statusin e klientit në nevojë mund të përballet me ndërprerjen e energjisë nëse nuk respekton marrëveshjen e shlyerjes së detyrimeve, refuzon vazhdimisht mundësitë e arsyeshme të pagesës që i ofron furnizuesi ose nuk arrin një marrëveshje të re pasi ka shkelur planin e mëparshëm.
Rregullorja parashikon gjithashtu ndërprerjen në raste të caktuara kur instalimet elektrike nuk përmbushin kërkesat e sigurisë, si dhe për shkaqe të tjera që legjislacioni i njeh shprehimisht.
Megjithatë, furnizuesi nuk mund t'i ndërpresë dritat një familjeje të varfër thjesht sepse ajo ka një faturë të papaguar. Përpara se të kërkojë ndërprerjen, ai duhet t'i ofrojë klientit mundësinë e lidhjes së një marrëveshjeje për shlyerjen e detyrimit, duke marrë parasysh gjendjen e tij ekonomike.
Dokumenti përcakton edhe procedurën e paralajmërimit. Furnizuesi duhet të dërgojë të paktën dy njoftime me shkrim. Në njoftimin e parë duhet të shpjegojë arsyen e ndërprerjes, shumën e detyrimit dhe mundësitë e pagesës. Familja duhet të ketë të paktën shtatë ditë kalendarike për të paguar, për të lidhur një marrëveshje ose për të paraqitur dokumente që provojnë se furnizimi nuk mund t'i ndërpritet.
Vetëm pas përfundimit të këtij afati mund të dërgohet njoftimi i dytë. Operatori i Sistemit të Shpërndarjes duhet të verifikojë përmbushjen e kushteve ligjore përpara se të kryejë ndërprerjen.
Projekt-rregullorja njeh mbrojtje të veçantë për familjet që kanë pjesëtarë të varur nga pajisje mjekësore për mbështetjen e jetës. Furnizuesi nuk mund t'ua ndërpresë energjinë për mospagesë kur familja e ka deklaruar dhe dokumentuar paraprakisht këtë rrethanë.
Mbrojtja shtrihet edhe te klientët që kanë paraqitur kërkesë për të përfituar statusin e klientit në nevojë dhe janë ende në pritje të një vendimi, me kusht që furnizuesi të ketë marrë informacion për kërkesën.
Ndërprerja ndalohet gjithashtu për familjet që po respektojnë një marrëveshje pagese. Neni 5 i projektit e ndalon furnizuesin të kërkojë ndërprerjen gjatë shqyrtimit të një ankese për detyrimin që ka shkaktuar procedurën.
Megjithatë, një tjetër dispozitë e dokumentit ngre pikëpyetje. Neni 9 përcakton se paraqitja e ankesës nuk e pezullon automatikisht procedurën e ndërprerjes, përveç rasteve që parashikon ligji ose kur ERE vendos pezullimin.
Këto dy formulime kërkojnë sqarim përpara miratimit përfundimtar. Një familje që kundërshton shumën e faturës duhet të dijë saktësisht nëse furnizuesi mund t'ia ndërpresë energjinë gjatë shqyrtimit të ankesës. Paqartësia ndërmjet dy neneve mund të krijojë interpretime të ndryshme dhe mosmarrëveshje mes klientëve dhe furnizuesit.
Problemi i ndërprerjes së energjisë për familjet e varfra nuk është i ri. Një dokument i Komisionerit për Mbrojtjen nga Diskriminimi, i datës 17 dhjetor 2025, tregon se çfarë pasojash mund të ketë pamundësia ekonomike për të paguar faturat.
Rasti lidhet me një çift të moshuar në Laprakë të Tiranës. Sipas informacionit që Komisioneri administroi gjatë shqyrtimit, bashkëshortët kishin jetuar për rreth 11 vjet pa energji elektrike. Ata deklaruan se kishin të ardhura mujore prej 10 mijë dhe 12 mijë lekësh, ndërsa detyrimi i grumbulluar në sistem kishte arritur në rreth 306 mijë lekë.
Hetimi administrativ zbuloi edhe një problem tjetër. Sipas informacionit që OSHEE i dërgoi Komisionerit më 8 prill 2025, kontrata kishte vazhduar të faturohej me tarifë shërbimi, megjithëse faturimi i fundit me konsum rezultonte në prill 2018.
OSHEE njoftoi se detyrimi ishte shlyer më 21 mars 2025 dhe se familja furnizohej sërish me energji. Institucioni sqaroi gjithashtu se kontrata nuk kishte figuruar në listat e familjeve në nevojë që administrata sociale i dërgonte furnizuesit.
Rasti nxjerr në pah një problem që shkon përtej detyrimit për të paguar energjinë. Një familje mund të jetojë në varfëri, por të mos figurojë në regjistrin zyrtar të klientëve në nevojë. Në këtë rast, mbrojtja që parashikon legjislacioni mund të mos zbatohet për të, derisa institucionet t'ia njohin statusin.
Projekt-rregullorja e re ia ngarkon Operatorit të Sistemit të Shpërndarjes administrimin e regjistrit të klientëve në nevojë. Furnizuesi do të marrë prej tij të dhënat e familjeve që gëzojnë këtë status. Kontrata e posaçme do të fillojë ditën e regjistrimit dhe, në rast se klienti e humbet statusin, do të përfjë në fund të muajit të dytë pas çregjistrimit.
Kjo procedurë e bën vendimtare saktësinë e regjistrit dhe shkëmbimin e informacionit ndërmjet institucioneve. Një vonesë administrative ose një familje që mbetet jashtë listës mund të krijojë pasoja të drejtpërdrejta për mbrojtjen e saj.
Komisioneri për Mbrojtjen nga Diskriminimi i kërkoi qeverisë në dhjetor 2025 të merrte masa për mosndërprerjen e energjisë së familjeve në vështirësi ekonomike dhe të të moshuarve. Rekomandimi erdhi pas shqyrtimit të rastit të Laprakës dhe problematikave që lidhen me zbatimin e mbrojtjes ligjore.
Në këtë kontekst, rregullorja e re e ERE-së ka rëndësi jo vetëm për kompanitë energjetike, por edhe për mënyrën si funksionon sistemi i mbrojtjes sociale.
Furnizuesi ka interes të arkëtojë faturat dhe të kufizojë detyrimet e papaguara. Familjet në nevojë kanë interes të ruajnë furnizimin me energji edhe kur përballen me vështirësi ekonomike. Shteti duhet të përcaktojë mekanizmin që i pajton këto dy interesa, përfshirë mënyrën e financimit të mbrojtjes së klientëve që nuk mund të përballojnë pagesat.
Marrëveshjet e shlyerjes përbëjnë një instrument të dobishëm kur familja ka mundësi reale të paguajë me këste. Megjithatë, një marrëveshje që nuk merr parasysh të ardhurat e familjes mund të kthehet në një detyrim që ajo nuk arrin ta përmbushë. Projekt-rregullorja kërkon përshtatjen e planit me mundësitë e klientit, por nuk përcakton një formulë numerike për llogaritjen e këstit në raport me të ardhurat.
Edhe rilidhja e energjisë mbetet një çështje me rëndësi. Projekti parashikon që furnizuesi të marrë masa për rikthimin e energjisë brenda 48 orëve, me kërkesë të klientit dhe pas shlyerjes së detyrimit që ka shkaktuar ndërprerjen, sipas kushteve teknike dhe procedurave përkatëse.
Kjo dispozitë përcakton afatin për rilidhjen, por nuk zgjidh problemin e një familjeje që nuk ka mundësi financiare ta shlyejë detyrimin.
Dokumenti i ERE-së nuk paraqet një numër të familjeve që mund të preken nga rregullat e reja. Ai nuk tregon as sa klientë kanë aktualisht statusin e klientit në nevojë, sa prej tyre kanë detyrime të papaguara dhe sa ndërprerje të energjisë kanë ndodhur në këtë kategori gjatë viteve të fundit.
Pa këto të dhëna, është e vështirë të vlerësohet ndikimi real i rregullores.
ERE dhe institucionet përgjegjëse për mbrojtjen sociale duhet të sqarojnë veçanërisht si do të trajtojnë familjet që plotësojnë kushtet ekonomike për mbrojtje, por ende nuk janë regjistruar, si do t'i verifikojnë marrëveshjet e pagesës dhe si do t'i zgjidhin ankesat përpara ndërprerjes së furnizimit.
Projekt-rregullorja përmban masa mbrojtëse dhe përcakton procedura që furnizuesi duhet t'i respektojë. Ajo parashikon njëkohësisht rastet kur një familje në nevojë mund të mbetet pa energji elektrike.
Pikërisht ky është thelbi i debatit që ERE ka hapur: **kur një familje nuk arrin të paguajë dritat, deri ku shkon detyrimi i saj financiar dhe ku fillon përgjegjësia e shtetit për të garantuar furnizimin?**
Përgjigjja nuk mund të kufizohet te dy njoftime me shkrim dhe një afat shtatëditor. Ajo varet nga mënyra si shteti identifikon familjet në varfëri, si përcakton mundësinë e tyre për të paguar dhe çfarë mbështetjeje u ofron përpara se t'u ndërpresë energjinë./Pamfletienergjia elektrike Lini një Përgjigje Anuloje përgjigjen Ekonomi Buxheti 2027, qeveria lë në mëshirë të fatit arsimin, shëndetësinë dhe pensionistët 7 Nëntor 2026, 11:0411:04Ekonomi Forcimi i Lekut ul më tej peshën e borxhit të jashtëm në valutë të huaj 7 Nëntor 2026, 08:1008:10Ekonomi Euro në pikiatë, mesoni me sa blihen dhe shiten monedhat e huaja sot 7 Nëntor 2026, 07:1807:18Ekonomi Bizneset gjermane kundër paketës fiskale 2027: Rritja e taksave rrezikon investimet dhe vendet e punës 6 Nëntor 2026, 15:3515:35Ekonomi Shqipëria përqendrohet në Tiranë: Kryeqyteti gllabëron 80% të rritjes ekonomike, 11 qarqet e tjera mbeten në hije! 6 Nëntor 2026, 14:0714:07Ekonomi Rama u jep një tjetër mundësi fitimi investitorëve strategjikë, 40% e resorteve mund të shiten si banesa 6 Nëntor 2026, 13:0013:00Ekonomi