Pas më shumë se 9 orësh, ngjarja në Roskovec ka përfunduar me një tjetër tragjedi. Autori i krimit, Refit Buzi, pas disa orësh i ngujuar ka vrarë vetën, duke mos iu dorëzuar efektivëve. Rrethimi i Refit Buzit nga Policia në fshatin Kurjan të Roskovecit zgjati rreth 8 orë.
Ngjarja e rëndë ndodhi mëngjesin e sotëm në Roskovec. Buzi, vrau me armë zjarri ish-vjehrrin dhe plagosi ish-vjehrrën. Ndërsa rrëmbeu për disa orë ish-partnerën, të cilën e liroi pas disa orësh. Në deklaratën e dhënë për mediat, drejtori i Policisë Fier Erion Ahmeti tha se 35-vjeçari ka kërcënuar disa herë se do t’i jepte fund jetës me armën e gjahut, me të cilën vrau ish-vjehrrin dhe plagosi ish-vjehrrën. Ndërkohë burime nga DVP Fier bëjnë me dije për “News24” se ish-partnerja e Refit Buzit ka lënë ambientet e spitalit dhe ndodhet në komisariat, ku po merret në pyetje.
Informacion nga policia- Në vijim të informacionit paraprak për ngjarjen e rëndë kriminale të ndodhur në fshatin Vidhisht, Roskovec, ku shtetasi R. B., 35 vjeç, vrau me armë gjahu babanë e ish-të dashurës së tij, plagosi nënën e saj dhe mori peng ish-të dashurën, shtetasen R.P, ju informojmë se:
Pas lirimit të saj falë veprimeve profesionale të Policisë, ekipi negociator i RENEA-s, në bashkëpunim me shërbimet e Drejtorisë Vendore të Policisë Fier, nën drejtimin e Prokurorit, vijoi negociatat me 35-vjeçarin, me qëllim bindjen e tij për t’u dorëzuar dhe për të shmangur përshkallëzimin e mëtejshëm të situatës.
Pavarësisht negociatave intensive, të zhvilluara që prej orëve të para të mëngjesit, 35-vjeçari nuk iu bind thirrjeve të Policisë për t’u dorëzuar dhe, rreth orës 16:35, dyshohet se është vetëvrarë me armën e gjahut që mbante me vete, brenda automjetit. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: krimi policia Refit Buzi Roskovec