Detaje të reja kanë dalë në dritë lidhur me arrestimin e edukatores së një kopshti privat në Tiranë, e dyshuar për ushtrim dhune ndaj një fëmije 2-vjeçar. Mësohet se ngjarja ka ndodhur në kopshtin “Lala” në rrugën Aleksandër Mojsiu, në ish-Kinostudio, në Tiranë.
E arrestuara është Brunilda Haxhiu, 32 vjeçe, e cila u vu në pranga pas denoncimit të bërë nga babai i të miturit, pasi konstatoi shenja dhune në fytyrën e djalit të tij. Fëmija u dërgua fillimisht në spital, ku iu kryen ekzaminimet mjekësore dhe u konstatua skuqje në pjesën e veshit dhe nxirje në faqe.
Gjatë dëshmisë së saj para hetuesve, 32-vjeçarja ka pranuar se e ka goditur me shpullë të miturin. Sipas saj, veprimi erdhi pasi fëmija nuk po e zinte gjumi dhe ajo "nuk e duronte dot". Kjo deklaratë është bërë një nga elementët kryesorë të hetimit që po zhvillohet nga organet kompetente.
Sipas informacioneve paraprake, edhe pamjet e kamerave të sigurisë në ambientet e kopshtit kanë konfirmuar ushtrimin e dhunës fizike ndaj 2-vjeçarit. Materialet procedurale i janë referuar Prokurorisë, e cila po vijon hetimet për zbardhjen e plotë të rrethanave të ngjarjes dhe përcaktimin e përgjegjësive ligjore.