Foto ilustruese Përplasja e sotme mes qeverisë dhe sistemit të drejtësisë për pagat e magjistratëve nuk lindi në vitin 2026. Rrënjët e saj janë në vitin 2023, kur mazhoranca dhe opozita bashkuan votat për të rritur ndjeshëm pagat e deputetëve, ministrave dhe drejtuesve më të lartë të shtetit, ndërsa për gjyqtarët dhe prokurorët u ndryshua formula në një mënyrë që u solli vetëm 570 lekë rritje të pagës referuese. Tre vjet më vonë, Gjykata Kushtetuese e rrëzoi këtë mekanizëm dhe sot vendi ndodhet në një përplasje të hapur mes qeverisë, Thesarit dhe sistemit të drejtësisë. Historia e konfliktit për pagat e magjistratëve nis përpara vitit 2023. Në vitin 2021, Parlamenti ndërhyri në ligjin “Për statusin e gjyqtarëve dhe prokurorëve”, duke ndryshuar mënyrën e llogaritjes së pagave të tyre.
Ndryshimet u kundërshtuan nga Unioni i Gjyqtarëve, i cili i konsideroi si ulje page dhe si cenim të garancive kushtetuese për pavarësinë e gjyqësorit. Çështja përfi në Gjykatën Kushtetuese, e cila në vitin 2022 pranoi padinë dhe rrëzoi dispozitat e ndryshuara, duke i kërkuar Kuvendit të ndërhynte sërish dhe të qartësonte formulën e pagës referuese.
Kuvendi u rikthye te çështja në vitin 2023. Në letër, synimi ishte zbatimi i vendimit të Kushtetueses. Në praktikë, pikërisht aty u krijua nyja që sot ka shpërthyer në konflikt.
Në fund të majit 2023, deputetët e PS-së dhe opozitës bashkuan votat për reformën e pagave. Paga e një deputeti u rrit nga 156 770 lekë në 310 250 lekë bruto. Ministrat kaluan nga 174 760 lekë në 318 750 lekë, ndërsa paga e kryeministrit dhe e kryetarit të Kuvendit u rrit në rreth 393 mijë lekë. Presidenti u vendos në krye të piramidës me një pagë prej 425 mijë lekësh.
Pra, në një moment kur politika vendoste të rriste fort pagat e veta, u rishkrua edhe formula e pagave të magjistratëve.
Paga e gjyqtarëve dhe prokurorëve u lidh me pagën e Presidentit të Republikës. Në dukje, kjo duhej të krijonte një sistem më të qartë dhe më të qëndrueshëm. Por në të njëjtën kohë administrata publike dhe zyrtarët e lartë përfituan rritje shumë më të mëdha.
Për magjistratët, efekti ishte pothuajse simbolik: vetëm 570 lekë më shumë në pagën referuese.
Pikërisht kjo diferencë krijoi pakënaqësinë e madhe. Gjyqtarët argumentuan se nuk mund të quhej rritje reale një ndryshim prej 570 lekësh në një kohë kur pagat e administratës dhe funksionarëve të lartë po rriteshin me dhjetëra mijëra lekë.
Unioni i Gjyqtarëve e konsideroi këtë si një ulje faktike të pagës. Sipas tyre, edhe pse nominalisht rroga nuk ishte ulur, ata ishin shkëputur nga mekanizmi që do t’u lejonte të përfitonin nga rritjet e përgjithshme të sistemit të pagave.
Në llogaritjet e tyre, magjistratëve u ishte mohuar një rritje prej rreth 78 mijë lekësh.
Kjo solli një tjetër betejë gjyqësore dhe çështja përfi sërish në Gjykatën Kushtetuese.
Më 17 shkurt 2026, Kushtetuesja dha një vendim që e rrëzoi formulën e vitit 2023. Gjykata arsyetoi se magjistratët duhet të kenë një trajtim të diferencuar financiar si pjesë e garancive për pavarësinë e tyre dhe se skema e miratuar nga Kuvendi kishte krijuar një ulje të fshehtë të të ardhurave të tyre.
Në thelb, Kushtetuesja pranoi argumentin se nuk mjafton që paga të mos ulet në shifër absolute. Nëse pagat e pjesës tjetër të administratës dhe funksionarëve të lartë rriten ndjeshëm, ndërsa magjistratët mbeten thuajse në të njëjtin nivel, atëherë cenohen garancitë që sistemi i drejtësisë kishte fituar me reformën.
Kushtetuesja i la Kuvendit afat deri më 31 korrik 2026 për të rregulluar situatën.
Por Kuvendi nuk veproi.
Pas kalimit të afatit, Këshilli i Lartë Gjyqësor zbatoi vendimin e Kushtetueses dhe përcaktoi pagën e re referuese. Paga bazë u llogarit në 222 425 lekë dhe, së bashku me shtesën e kualifikimit prej 14 mijë lekësh, niveli fillestar arriti në 236 425 lekë.
Por problemi nuk ishte vetëm paga e re.
Vendimi parashikonte edhe kompensimin e diferencave të prapambetura që nga prilli i vitit 2023. Pra, shteti duhej të përballonte edhe pagesat e akumuluara për më shumë se tre vjet.
Këtu nisi përplasja e vërtetë.
Thesari nuk ekzekutoi menjëherë pagesat, ndërsa qeveria nisi të kundërshtonte mënyrën se si sistemi i drejtësisë po kërkonte zbatimin financiar të vendimit.
Kryeministri Edi Rama e ka paraqitur çështjen si një përpjekje të gjyqësorit për të hyrë drejtpërdrejt në financat e shtetit, duke përdorur formulimin se pushteti gjyqësor nuk mund “ta hapë vetë derën e thesarit”.
Nga ana tjetër, gjyqtarët dhe prokurorët këmbëngulin se nuk po vendosin vetë pagat dhe as po krijojnë një shpenzim të ri, por po kërkojnë zbatimin e një vendimi detyrues të Gjykatës Kushtetuese.
Përplasja është përshkallëzuar deri në kallëzime penale dhe procedime ndaj zyrtarëve të Thesarit për moszbatim të vendimeve gjyqësore.
Në Berat, Prokuroria ka regjistruar një procedim penal pas kallëzimit të punonjësve të administratës së gjykatës dhe po heton përgjegjësitë e degës së Thesarit.
Në të njëjtën kohë, përfaqësues të sistemit të drejtësisë kanë paralajmëruar se, nëse situata nuk zgjidhet, mund të ketë reduktim të aktivitetit gjyqësor dhe fokusim vetëm te çështjet urgjente.
Kështu, një reformë që në vitin 2023 u shoqërua me një konsensus të rrallë mes PS-së dhe opozitës për rritjen e pagave të deputetëve dhe funksionarëve të lartë, tre vjet më vonë është kthyer në një krizë të hapur institucionale.
Kontrasti mbetet i fortë: deputetët i dyfishuan thuajse pagat e tyre, ministrat dhe drejtuesit e lartë përfituan rritje të mëdha, ndërsa magjistratëve iu la një diferencë prej vetëm 570 lekësh.
Sot, pikërisht ai vendim i vitit 2023 është kthyer në burimin e një prej përplasjeve më serioze mes politikës dhe drejtësisë. /Pamfletipagat e gjyqtareve rama berisha Lini një Përgjigje Anuloje përgjigjen Politike Leskaj i përgjigjet Ramës pas sulmit për protestën në Vlorë: Kontrollojani 'mallin' ose çojeni për ta vizituar 12 Shtator 2026, 18:4318:43Politike “Revoltë” në Turqi kundër 'Shtetit Bektashi' të Ramës, kërkohet ndërhyja e Erdoganit! 12 Shtator 2026, 16:1416:14Politike Rama 'kërcënon' administratën: Çdo shkelje afati do ketë kosto 12 Shtator 2026, 14:2214:22Politike Ina Zhupa akuza Ramës: Shqipëria nuk është pronë e Ronëve dhe Agasëve! 12 Shtator 2026, 14:1714:17Politike Rrethimi i madh: Edi Rama përballë protestës dhe kritikave të së majtës ndërkombëtare 12 Shtator 2026, 13:2513:25Politike Nga trafiku i armëve te bankat, Tabaku shënjestron Ramën: Tre ishujt e pushtetit si u vidhen paratë shqiptarëve nga qeveria 12 Shtator 2026, 12:3212:32Politike