Dy persona janë nxjerrë të gjallë nga një tunel i një hidrocentrali në distriktin Rasuwa, në veri të Nepalit, pasi kishin qëndruar për rreth dy ditë të bllokuar nën tokë, mes baltës dhe mbetjeve të shkaktuara nga përmbytjet dhe rrëshqitjet masive të dheut.
Pamjet e publikuara nga Zyra e Kryeministrit të Nepalit tregojnë momentet dramatike kur ekipet e shpëtimit depërtojnë në tunel dhe tërheqin personat e bllokuar përmes baltës që kishte mbuluar dhe bllokuar daljen.
Sipas autoriteteve nepaleze, deri tani janë nxjerrë nga tuneli 350 persona, ndërsa operacioni i kërkim-shpëtimit vijon për të evakuuar më shumë se 100 persona që dyshohet se ndodhen ende të bllokuar brenda.
Forcat e ushtrisë kanë ndërhyrë në zonë, duke kaluar përmes baltës dhe ujit të grumbulluar në tunel për të arritur te personat e bllokuar dhe për t’i transportuar më pas drejt zonave të sigurta, përfshirë evakuimin me helikopter.
Përveç personave të nxjerrë nga tuneli, ekipet e shpëtimit kanë transferuar edhe 533 banorë të tjerë në vende të sigurta nga zonat e prekura nga përmbytjet.
Katastrofa goditi luginën e Rasuwa-s në veri të Nepalit dhe preku edhe zonat fqinje të Tibetit, në Kinë. Autoritetet e lidhin ngjarjen me një masë të madhe uji dhe mbetjesh të shkaktuar nga shkrirja dhe shembja e akullnajave pranë kufirit me Tibetin, duke e bërë situatën shumë më të rëndë se një përmbytje e zakonshme gjatë sezonit të musoneve.
Bilanci i fatkeqësisë mbetet i rëndë. Mbi 1,000 persona rezultojnë të zhdukur, ndërsa ekipet e shpëtimit vijojnë kërkimet në zonat e mbuluara nga balta, uji dhe mbetjet. Operacioni në tunelin hidroenergjetik vazhdon, ndërsa ekipet po përpiqen të arrijnë te personat që mund të kenë mbetur ende të bllokuar nën tokë.