Dhjetëra kuintalë shalqi e pjepër po shkojnë dëm në fushat e zonës së Dimalit, ndërsa fermerët po përballen me një tjetër sezon të vështirë ku prodhimet e tyre nuk u mbulojnë as kostot bazë të prodhimit. Mungesa e një tregu të organizuar grumbullimi si dhe mosmarrja e subvencioneve të premtuara i ka detyruar banorët e zonës të dalin përgjatë aksit rrugor për të siguruar të ardhurat minimale për familjet e tyre.
Në fshatrat Sheqë, Gajdë, Polizhan, Malas Gropë, Syzezë dhe Poshnje, fermerët dalin çdo ditë përgjatë aksit nacional Dimal-Lushnje me shpresën për të shitur shalqirin, pjeprin dhe produktet e tjera të stinës. Të mbetur pa mbështetje financiare, ata detyrohen ta shesin mallin me çmime jashtëzakonisht të ulëta që shkojnë deri në njëzet lekë për kilogram, çmim ky që nuk mbulon dot as shpenzimet e punimit të tokës. Prodhuesit shprehen se rritja e çmimeve të farave dhe plehrave kimike e ka bërë të pamundur përballimin e kostove, ndaj kërkojnë ndërhyrjen e shtetit për lehtësimin e këtyre shpenzimeve bazë.
Kjo situatë e përsëritur çdo sezon ka prekur edhe blerësit, të cilët duke njohur mundin e fermerëve, apelojnë që qeveria të marrë masa urgjente. Blerësit ngrenë shqetësimin se tregtimi buzë rrugës nacionale bëhet në ambiente të papërshtatshme, ndaj kërkojnë ndërtimin e tregjeve të sigurta dhe krijimin e kushteve që prodhuesit e Dimalit të kenë ku ta shesin punën e tyre. Për sa kohë do të mungojnë tregjet e garantuara dhe subvencionet e premtuara, prodhimet vendase do të vazhdojnë të kalben në fusha ndërsa fermerët do të mbeten në mëshirë të rrugës.