Pas denoncimit të publikuar disa orë më parë nga JOQ Albania, ku një qytetar pretendoi se ishte dhunuar me levë nga Almir Çekrezi, kanë mbërritur në redaksi disa reagime nga persona që pretendojnë se njohin të dyja palët dhe japin një tjetër version për ngjarjen.
Sipas tyre, konflikti mes dy të rriturve nuk mund të shkëputet nga një episod i ndodhur dy ditë më herët, ku pretendohet se djali i Almir Çekrezit, i mitur, është goditur me thikë nga Loli Çoku.
Një prej personave që ka reaguar thotë se goditja ka ndodhur në pjesën e majtë të kraharorit, poshtë gjoksit, në drejtim të zemrës. Sipas këtij versioni, i mituri ka pësuar një plagë që ka kërkuar qepje dhe është dërguar për mjekim në urgjencën e Gramshit.
Personi pretendon se fëmija nuk ua ka treguar menjëherë prindërve atë që kishte ndodhur, pasi ishte i frikësuar dhe i traumatizuar, ndërsa të nesërmen ka rrëfyer ngjarjen në familje. Sipas tij, sapo prindërit janë vënë në dijeni, e kanë dërguar në spital, ku plaga është qepur.
Në redaksi është dërguar edhe një fotografi ku duket një plagë e qepur në pjesën e sipërme të trupit të të miturit. Pala që e ka dërguar fotografinë pretendon se ajo është dëmtimi i shkaktuar gjatë episodit të përmendur. Nga fotografia, megjithatë, nuk mund të përcaktohet mënyra se si është shkaktuar plagosja apo autori i saj.
Sipas të njëjtit reagim, pas mjekimit të të miturit, Almir Çekrezi ka bërë kallëzim në Policinë e Gramshit për atë që ai e konsideron si tentativë vrasjeje. Pala tjetër pretendon gjithashtu se policia ka qenë në dijeni të rastit dhe se në dispozicion të saj ndodhen edhe fotografi të plagës.
Një tjetër person që thotë se është prind dhe banon në Gramsh pretendon se episodi i përmendur nuk është i vetmi rast që ka shkaktuar shqetësim te prindërit e zonës. Sipas saj, ka pasur edhe raste të tjera konfliktesh me persona të mitur, ndërsa disa prindër, sipas pretendimit të saj, nuk kanë bërë denoncime nga frika për fëmijët e tyre.
Një tjetër reagim vjen nga një person që deklaron se është dëshmitar dhe se i njeh të dyja palët. Ai pretendon se ka dëgjuar për disa raste të mëparshme konfliktesh, duke përmendur edhe episode ku janë përfshirë të mitur. Për rastin konkret të plagosjes me thikë, ky person thotë se është i gatshëm të drejtohet edhe në polici për të dhënë informacionet që pretendon se disponon.
Ndërkohë, një tjetër prind ka treguar një episod të mëparshëm që, sipas tij, lidhet me të njëjtin person. Ai pretendon se rreth një muaj më parë, djali i tij, vetëm 2-vjeç, ishte pranë lokalit të familjes duke ngrënë, kur një person i është afruar dhe e ka trembur. Sipas tij, pas këtij episodi fëmija ka shfaqur frikë ndaj personave të panjohur.
Ky prind thekson se për rastin konkret të publikuar nga JOQ Albania nuk ka qenë dëshmitar dhe se informacionin për të e ka marrë nga artikulli ynë, ndërsa ngjarjen që pretendon se i ka ndodhur djalit të tij e paraqet si një shqetësim të veçantë.
Reagimet e mbërritura në redaksi kanë një pikë të përbashkët: sipas personave që i kanë dërguar, ngjarja e ndodhur mes dy të rriturve duhet parë në kontekstin e konfliktit të mëparshëm dhe të plagosjes së pretenduar të të miturit.
Pra, ndërsa në denoncimin e parë qytetari pretendoi se ishte sulmuar me levë nga Almir Çekrezi dhe se akuzat ndaj tij për goditjen e djalit ishin të pavërteta, pala tjetër pretendon të kundërtën: se konflikti ka ardhur pasi i mituri është plagosur me thikë dhe se për këtë rast është bërë kallëzim në polici.
Të gjitha këto janë pretendime të personave që kanë reaguar pas publikimit të denoncimit të parë. Përgjegjësia dhe rrethanat e sakta të ngjarjeve mbeten për t’u përcaktuar nga organet kompetente.