Kryeministri Muhammad Shehbaz Sharif dhe Shefi i Shtabit të Ushtrisë, Feldmarshal Asim Munir, takohen me presidentin e Shteteve të Bashkuara, Donald Trump, në Shtëpinë e Bardhë në Uashington, DC, shtator 2025 Pakistani ka fituar një rol më të rëndësishëm diplomatik gjatë mandatit të dytë të Donald Trump, duke forcuar marrëdhëniet me Shtetet e Bashkuara. Megjithatë, analistët vënë në dyshim përfitimet konkrete të Islamabadit dhe paralajmërojnë se zgjedhjet e 3 nëntorit për Kongresin amerikan mund të ndikojnë në të ardhmen e këtij partneriteti. Në fund të shtatorit, gjatë një takimi në Nju Jork, ministri i Jashtëm indian, S. Jaishankar, pranoi se marrëdhëniet e shumë vendeve me Shtetet e Bashkuara janë vështirësuar gjatë presidencës së Donald Trump.
Megjithatë, Pakistani, rivali historik i Indisë, përbën një përjashtim nga kjo prirje.
Mandati i dytë i Trump ka sjellë ndryshime të mëdha në marrëdhëniet ndërkombëtare. Politikat tarifore, lufta me Iranin dhe qëndrimet e administratës amerikane kanë dobësuar besimin e aleatëve tradicionalë të Uashingtonit, duke nxitur disa prej tyre të kërkojnë partneritete alternative.
Në këtë situatë, Pakistani ka arritur të transformojë marrëdhëniet e tensionuara me SHBA-në në një partneritet që Trump e vlerëson vazhdimisht publikisht.
Ky afrim ka ndodhur ndërkohë që qeveria në Islamabad përballet me kritika të brendshme për pretendimet se po shtyp opozitën politike dhe po forcon ndikimin e ushtrisë mbi institucionet civile.
Me afrimin e zgjedhjeve të 3 nëntorit, të cilat do të përcaktojnë balancën e pushtetit në Dhomën e Përfaqësuesve dhe Senat, Pakistani ka arsye të preferojë një rezultat të favorshëm për Trump dhe Partinë Republikane.
Gjatë fjalimit në Asamblenë e Përgjithshme të OKB-së në shtator, Trump vlerësoi kryeministrin pakistanez Shehbaz Sharif, duke kujtuar deklaratën e tij se presidenti amerikan kishte ndihmuar në shpëtimin e 30 milionë jetëve përmes ndërhyrjes në konfliktin mes Indisë dhe Pakistanit.
Nga marrëdhëniet e tensionuara te afrimi diplomatik
Për dekada, Pakistani dhe Shtetet e Bashkuara kanë ruajtur lidhje të rëndësishme politike dhe ushtarake. Megjithatë, marrëdhëniet u përkeqësuan gjatë viteve të fundit, ndërsa Uashingtoni forcoi bashkëpunimin me Indinë dhe shprehu dyshime për rolin e Islamabadit në Afganistan.
Situata nisi të ndryshonte në mars 2025, kur Trump falënderoi publikisht Pakistanin për ndihmën në arrestimin e një të dyshuari të përfshirë në sulmin e vitit 2021 pranë aeroportit të Kabulit.
Një tjetër pikë kthese erdhi në maj 2025, kur India dhe Pakistani zhvilluan një konflikt ushtarak katërditor, pas vrasjes së 26 turistëve në Kashmirin e administruar nga India.
Konflikti përfi me një armëpushim më 10 maj. Trump ishte i pari që njoftoi marrëveshjen, ndërsa Pakistani e falënderoi për ndërmjetësimin. India, megjithatë, e kundërshton këtë version dhe këmbëngul se armëpushimi u arrit përmes bisedimeve dypalëshe.
Që prej asaj kohe, marrëdhëniet mes Islamabadit dhe Uashingtonit janë intensifikuar. Udhëheqësit pakistanezë janë pritur në Shtëpinë e Bardhë, administrata amerikane ka ulur tarifat për eksportet pakistaneze dhe Islamabadi ka marrë një rol ndërmjetësues në konfliktin mes SHBA-së dhe Iranit.
Trump priti gjithashtu shefin e ushtrisë pakistaneze, feldmareshalin Asim Munir, të cilin e ka cilësuar si “feldmareshalin tim të preferuar”.
Pakistani propozoi gjithashtu presidentin amerikan për Çmimin Nobel për Paqen, ndërsa kryeministri Sharif e vlerësoi publikisht për rolin në shmangien e përshkallëzimit të konfliktit me Indinë.
Pakistani zgjeron ndikimin në Lindjen e Mesme
Sipas analistëve, rëndësia e Pakistanit për Uashingtonin nuk kufizohet më vetëm te marrëdhëniet me Indinë apo zhvillimet në Afganistan.
“Pakistani është tashmë një aktor i rëndësishëm që duhet parë brenda arkitekturës së sigurisë së Lindjes së Mesme”, tha për Al Jazeera Qamar Cheema, drejtor ekzekutiv i Institutit Sanober në Islamabad.
Afrimi politik është shoqëruar edhe me marrëveshje ekonomike. Në korrik 2025, SHBA-ja uli tarifat për mallrat pakistaneze nga 29 në 19 për qind, ndërsa më pas u nënshkruan memorandume mirëkuptimi në sektorët e mineraleve strategjike, kriptomonedhave dhe dronëve.
Megjithatë, analisti gjeopolitik Imran Khan, ish-drejtor për Pakistanin në Institutin Amerikan të Paqes, vlerëson se përfitimet konkrete mbeten të kufizuara.
Sipas tij, afrimi me Trump ka rritur ndjeshëm profilin diplomatik dhe rëndësinë gjeopolitike të Pakistanit, por nuk ka sjellë përfitime të mëdha të drejtpërdrejta nga Uashingtoni.
Një nga zhvillimet më të rëndësishme ka qenë ndërmjetësimi mes Shteteve të Bashkuara dhe Iranit.
Pas sulmeve amerikano-izraelite kundër Iranit në shkurt, Pakistani ndërmjetësoi një armëpushim më 8 prill dhe organizoi bisedimet e drejtpërdrejta të nivelit më të lartë mes dy vendeve që nga viti 1979.
Në qershor, Uashingtoni dhe Teherani ranë dakord për një memorandum mirëkuptimi me 14 pika, të njohur si Memorandumi i Islamabadit.
Megjithatë, përpjekjet diplomatike nuk kanë sjellë ende një zgjidhje përfundimtare. Afati 60-ditor për negociata përfi në mes të gushtit pa një marrëveshje për zgjatjen e tij.
Më 20 tetor, feldmareshali Asim Munir vizitoi sërish Teheranin, për herë të pestë që nga fillimi i luftës, por nuk u njoftua ndonjë përparim konkret.
Grace Wermenbol, ish-zyrtare amerikane e sigurisë kombëtare dhe studiuese pranë German Marshall Fund, paralajmëron se konflikti me Iranin vazhdon të përbëjë një rrezik serioz për sigurinë e Gjirit Persik.
Sipas saj, po shtohen treguesit se Shtetet e Bashkuara, ndoshta në bashkëpunim me Izraelin, mund të rifillojnë sulmet pas zgjedhjeve në të dyja vendet.
Zgjedhjet për Kongresin, një provë për marrëdhëniet me Uashingtonin
Trump hyn në zgjedhjet e mesmandatit me nivele të ulëta të mbështetjes publike.
Sipas një sondazhi të Qendrës Kërkimore Pew, të zhvilluar nga 28 shtatori deri më 4 tetor, vetëm 30 për qind e amerikanëve miratonin punën e tij si president, krahasuar me 37 për qind në janar.
Një rezultat i dobët për republikanët mund të kufizojë hapësirën politike të administratës amerikane, përfshirë zbatimin e politikës së jashtme.
Analisti Imran Khan vlerëson se nëse demokratët fitojnë shumicën në të dyja dhomat e Kongresit, ata do t'u japin përparësi aleancave tradicionale të SHBA-së, si NATO, dhe do të jenë më të prirur të mbështesin Indinë sesa Pakistanin.
Grace Wermenbol thekson se aleatët dhe partnerët e Uashingtonit po analizojnë ndikimin e mundshëm të zgjedhjeve në politikën e jashtme amerikane.
Sipas saj, rezultati mund të ndikojë në pozicionin politik të Trump në periudhën afatshkurtër, ndërsa në një perspektivë më të gjatë mund të sinjalizojë ndryshime të mundshme në Shtëpinë e Bardhë gjatë viteve 2028 ose 2029.
Për Pakistanin, sfida kryesore mbetet ruajtja e rëndësisë së tij strategjike, pavarësisht zhvillimeve në politikën e brendshme amerikane.
A mund ta ruajë Pakistani rëndësinë e tij edhe pas Trump?
Qamar Cheema mendon se Islamabadi nuk duhet ta ndërtojë strategjinë e tij mbi forcimin apo dobësimin politik të presidentit amerikan.
Sipas tij, avantazhi kryesor i Pakistanit qëndron te roli në sigurinë e Lindjes së Mesme dhe te aftësia për të kontribuar në mbrojtjen e interesave amerikane në rajon.
“Nuk është thjesht çështje e dobësimit të ndikimit të Trump. Pyetja është se si Pakistani mund të vazhdojë të mbetet i rëndësishëm”, tha Cheema.
Edhe Imran Khan vlerëson se dobësimi politik i Trump mund të mos sjellë ndryshime të menjëhershme në marrëdhëniet dypalëshe, por mund të shënojë fillimin e rënies së rëndësisë që Pakistani ka fituar gjatë administratës aktuale.
Megjithatë, ai thekson se pozicioni ndërkombëtar i Islamabadit është forcuar, veçanërisht në çështjet e sigurisë dhe mbrojtjes në Azinë Perëndimore.
“Ajo që nuk ndryshon është profili gjeopolitik gjithnjë e më i lartë i Pakistanit në nivel global, si dhe rëndësia e tij në rritje për sigurinë dhe mbrojtjen në Azinë Perëndimore”, deklaroi Khan.
Sipas tij, kjo rëndësi do të vazhdojë pavarësisht forcës politike të administratës Trump apo qëndrimit të presidentit amerikan në pushtet.
Në këtë kontekst, zgjedhjet e 3 nëntorit përbëjnë një provë për marrëdhëniet mes Islamabadit dhe Uashingtonit. Një Kongres më pak mbështetës ndaj Trump mund ta ndërlikojë afrimin politik mes dy vendeve, por roli i Pakistanit në ndërmjetësimin e konflikteve dhe sigurinë rajonale mund t'i sigurojë një rëndësi strategjike që shkon përtej marrëdhënies personale me presidentin amerikan. /Përshtatur nga "Al Jazeera" Lini një Përgjigje Anuloje përgjigjen Rajoni dhe Bota Presidenti iranian mbërrin në Moskë, pritet të takohet me Putinin në samitin e vendeve eksportuese të gazit 26 Tetor 2026, 22:1522:15Rajoni dhe Bota Humbi zgjedhjet përballë Lulës, policia i bllokon pasaportën Flávio Bolsonaros 26 Tetor 2026, 21:5121:51Rajoni dhe Bota Izraeli në gatishmëri të lartë për zgjedhjet parlamentare, 20 mijë policë në terren 26 Tetor 2026, 21:3821:38Rajoni dhe Bota Trump mohon se Netanyahu i kërkoi mbështetje shtesë përpara zgjedhjeve në Izrael 26 Tetor 2026, 21:2121:21Rajoni dhe Bota 70 orë në qiell me Trump/ Kush janë njerëzit që i qëndrojnë pranë dhe çfarë fshihet pas udhëtimeve? 26 Tetor 2026, 20:3920:39Rajoni dhe Bota Çfarë politike të jashtme propozon Lista Studentore në Serbi? 26 Tetor 2026, 20:3720:37Rajoni dhe Bota