Një biznes që ushtron aktivitetin në fushën e lyerjes së automjeteve është përfshirë nga flakët gjatë orëve të natës, pranë zonës së Fushës së Vjetër në Gjirokastër. Zjarri ka shkaktuar dëme materiale në ambientet e biznesit, ndërsa shkaqet e rënies së tij mbeten ende të paqarta.
Në vendngjarje kanë mbërritur shërbimet zjarrfikëse, të cilat kanë ndërhyrë në kohë për neutralizimin e flakëve. Falë ndërhyrjes së tyre është bërë i mundur shuarja e zjarrit dhe parandalimi i përhapjes së tij në ambiente apo biznese të tjera pranë zonës.
Fatmirësisht, nga kjo ngjarje nuk raportohet për persona të lënduar. Ndërkohë, policia ka nisur hetimet për të përcaktuar shkaqet dhe rrethanat e plota të zjarrit, si dhe për të hedhur dritë mbi atë që ka ndodhur gjatë natës.