Presidenti amerikan Donald Trump deklaroi të mërkurën se Shtetet e Bashkuara kanë marrë “miliarda e miliarda fuçi nafte nga Venezuela”.
Gjatë një mitingu në Las Vegas, Trump iu referua edhe rrëmbimit të ish-presidentit venezuelian Nicolás Maduro nga forcat speciale amerikane në janar. Maduro aktualisht ndodhet në një burg në Nju Jork, në pritje të përballjes me akuzat për trafik droge. Zëvendëspresidentja e tij, Delcy Rodríguez, mori postin e presidentes dhe që atëherë thuhet se ka pranuar kërkesat e SHBA-së ndaj Venezuelës. Ndërkohë, Sekretari amerikan i Shtetit, Marco Rubio, raportohet se po vepron si figurë kryesore me ndikim në drejtimin e vendit.
Në fjalimin e tij, Trump kritikoi ashpër bandën venezueliane Tren de Aragua, por tha se tashmë ka një qëndrim pozitiv ndaj Venezuelës.
“Por tani, unë e dua Venezuelën. Po ecim shumë mirë në Venezuelë. Po marrim shumë naftë nga Venezuela dhe po shkojmë shumë mirë me ta. Miliarda e miliarda fuçi nafte po dalin nga Venezuela. Është një nga vendet më të pasura me naftë në botë”, tha Trump.
Ai shtoi se konflikti me Venezuelën kishte zgjatur vetëm “48 minuta” dhe pretendoi se SHBA-ja e kishte kompensuar shumëfish koston e luftës përmes burimeve të marra nga vendi.
“Kjo është mënyra e vjetër, apo jo? Fitimtarit i takojnë plaçkat”, u shpreh Trump, duke shtuar se një qasje e ngjashme po ndiqet edhe ndaj Republikës Islamike të Iranit.
Deklaratat e Trump për Iranin vijnë në një kohë kur vendi ka mbyllur ngushticën e Hormuzit, një rrugë detare strategjike përmes së cilës kalon rreth 20% e naftës së botës. Irani e mbylli ngushticën pasi SHBA-ja dhe Izraeli nisën një fushatë të gjerë sulmesh ajrore ndaj vendit në shkurt.