Një prej viktimave të tragjedisë së rëndë hekurudhore në Spanjë, ku humbën jetën të paktën 69 persona, është edhe shkencëtarja e Universitetit të Kembrixhit, Dr. Marta Shahbazi. Lajmi për vdekjen e saj është konfirmuar nga Instituti i Biologjisë Molekulare MRC, ku ajo drejtonte një grup kërkimor. Shahbazi ndodhej në njërin prej trenave të përfshirë në përplasjen tragjike pranë Urda-s, në jug të Madridit. Instituti kishte konfirmuar më herët se shkencëtarja ishte në një prej trenave, por vendndodhja e saj mbetej e panjohur. Instituti spanjoll CiMUS, në një mesazh ngushëllimi në rrjetet sociale, e cilësoi atë si një “studiuese të re brilante”, duke shprehur solidaritetin dhe ngushëllimet për familjen e saj. Marta Shahbazi ishte mbesa e María José Alonso, e cila punon në këtë institucion. Shkencëtarja ishte specialiste në biologjinë qelizore dhe drejtonte laboratorin që mbante emrin e saj pranë Kampusit Biomjekësor të Universitetit të Kembrixhit. Ajo ishte gjithashtu profesoreshë e asociuar në kuadër të Institutit të Qelizave Staminale të këtij universiteti. Kontributi i saj në studimin e zhvillimit të hershëm embrional te njerëzit ishte vlerësuar edhe nga Shoqata Spanjolle e Biologjisë së Zhvillimit, e cila e kishte shpallur fituese të një çmimi për punën e saj shkencore. Çmimi pritej t’i dorëzohej gjatë një konference në El Rompido, në jugperëndim të Spanjës. Marta Shahbazi kishte kryer doktoraturën në Qendrën Kombëtare Spanjolle të Kërkimeve për Kancerin, përpara se të bashkohej me Universitetin e Kembrixhit si kërkuese pas doktoraturës. Në vitin 2020, ajo iu bashkua Institutit të Biologjisë Molekulare MRC.
Aksidenti ndodhi kur një tren me shpejtësi të lartë i kompanisë shtetërore Renfe u përplas me pjesën e pasme të një treni të ndaluar, që operohej nga kompania Iryo. Në të dy trenat udhëtonin më shumë se 540 persona. Njëri prej tyre kishte 146 pasagjerë dhe një foshnjë, ndërsa në trenin tjetër ndodheshin 397 pasagjerë.
Tragjedia konsiderohet një prej aksidenteve më të rënda hekurudhore në historinë moderne të Evropës dhe më e rënda në Spanjë që prej vitit 2013. Në shtetin spanjoll janë shpallur tri ditë zie kombëtare. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: spanje Tragjedia treni