Një tërmet i fuqishëm me magnitudë 7.7 ka goditur mëngjesin e sotëm Indonezinë, duke shkaktuar të paktën 40 viktima dhe një numër të konsiderueshëm të plagosurish. Autoritetet paralajmërojnë se bilanci mbetet paraprak dhe mund të rritet, ndërsa operacionet e kërkim-shpëtimit vijojnë në zonat më të prekura.
Lëkundja kryesore goditi ishullin Flores pak para orës 05:00, sipas kohës lokale, ndërsa më pas zona u trondit nga disa tërmete pasuese, përfshirë një lëkundje me magnitudë 6.1.
Sipas Agjencisë së Meteorologjisë, Klimatologjisë dhe Gjeofizikës së Indonezisë, tërmeti kishte një vatër rreth 15 kilometra të thellë, çka e bëri goditjen veçanërisht të rrezikshme në sipërfaqe.
Pamjet nga zonat e prekura tregojnë dëme të mëdha në ndërtesa. Në portin e Maumeres, pjesë të mëdha betoni u shkëputën nga terminali dhe ranë mbi njerëzit që prisnin të hipnin në një traget. Situata u përkeqësua kur ura lidhëse me anijen u shemb dhe disa persona përfunduan në ujë.
Në Nusa Tenggara Lindore, raportohen viktima që u zunë poshtë rrënojave pasi shtëpitë e tyre u shembën ndërsa ishin në gjumë. Ekipet e emergjencës po kontrollojnë ndërtesat e dëmtuara për të gjetur persona që mund të kenë mbetur të bllokuar.
Pas tërmetit u dha edhe një paralajmërim për cunami, duke shkaktuar panik në zonat bregdetare. Paralajmërimi u hoq rreth tre orë më vonë, por ndërkohë shumë banorë u larguan me nxitim drejt zonave më të larta dhe më të sigurta.
Sipas autoriteteve lokale, rreth 2,000 persona janë evakuuar ose janë larguar vetë nga zonat e rrezikuara. Banorëve u është bërë thirrje të mos hyjnë në ndërtesat e dëmtuara, veçanërisht në ato ku janë evidentuar çarje apo dëmtime të strukturës.
Autoritetet vijojnë vlerësimin e dëmeve, ndërsa ekipet e kërkim-shpëtimit po punojnë mes rrënojave. Bilanci i viktimave dhe i të plagosurve pritet të ndryshojë, teksa operacionet në terren vazhdojnë.