Një 10-vjeçare me origjinë shqiptare mbeti e plagosur pas të shtënave me armë zjarri në zonën e Agios Panteleimonas në Athinë. Ngjarja ndodhi rreth orës 23:50 në rrugën Agorakritou, ku persona të paidentifikuar që lëviznin me automjet qëlluan në drejtim të fasadës së një kafeneje. Vajza, e cila është e bija e pronarit të lokalit, u plagos në pulpën e këmbës së majtë dhe u dërgua në spital nga nëna e saj.
Në momentin e sulmit, në kafene ndodheshin rreth 10 klientë, të gjithë shtetas shqiptarë. Sipas të dhënave paraprake, në automjet ndodheshin katër persona, të cilët qëlluan nga brenda makinës dhe më pas u larguan me shpejtësi. Automjeti i dyshuar se u përdor në ngjarje u gjet i djegur pak më vonë në zonën e Aspropirgou.
Policia greke ka nisur hetimet për identifikimin e autorëve dhe zbardhjen e motivit të sulmit. Ende nuk është përcaktuar nëse 10-vjeçarja u plagos nga një plumb apo nga një copëz e shkaktuar prej të shtënave. Hetuesit po punojnë për të sqaruar rrethanat e plota të ngjarjes.