Tirana u kthye në bazën nga ku zhvateshin europianët, ndërsa milionat lëviznin nga call-centerat drejt një qarku kompanish. SPAK goditi operatorët dhe sekuestroi disa qindarka te Amant Josifit, ndërsa ortakët gjeorgjianë mbetën jashtë goditjes publike Milton Group/ Gjykata gjermane dënoi një gjeorgjian për drejtimin nga Shqipëria të një fabrike mashtrimi me deri në 600 punonjës, ndërsa SPAK provoi se në rrjet vepronin shqiptarë dhe të huaj dhe sekuestroi disa pasuri të Amant Josifit. Në të njëjtën kohë, Revaz Saakadze, George Khetsuriani, Tatia e Paata Pavliashvili dhe Lela Gelkhvidze shfaqen në një qark biznesesh që prek familjen Josifi, rekrutimin, ndërtimin dhe KFC Albania. Në fund KFC u shit, ndërsa emrat e tyre nuk dolën në goditjen publike të SPAK-ut.
Në shkurt të këtij viti, drejtësia gjermane mbylli një pjesë të historisë që në Shqipëri kishte nisur vite më parë në zyrat e call-centerave. Mikheil Biniashvili, shtetas gjeorgjian dhe izraelit, u dënua me 7 vjet e 6 muaj burg pasi gjykata e Bambergut arriti në përfundimin se kishte drejtuar nga Shqipëria, mes janarit 2017 dhe majit 2019, një operacion mashtrimi me deri në 600 punonjës, që u mori viktimave rreth 8 milionë euro, ndërsa programi PumaTS i furnizuar prej tij u përdor në operacione të tjera me dhjetëra milionë euro dëme. Gjykata urdhëroi edhe konfiskimin e 2.4 milionë eurove.
Dënimi gjerman e vendos Shqipërinë aty ku ishte prej fillimit të kësaj historie si bazë operative e një industrie mashtrimi që telefononte qytetarë europianë, i fuste në platforma investimesh të rreme dhe i çonte paratë në një qark llogarish, kompanish dhe ndërmjetësish. Vetë SPAK, në dosjen 301/2021, ka deklaruar se grupi përbëhej nga shtetas shqiptarë dhe të huaj, se qendrat ndryshonin emra e adresa për t’iu fshehur policisë dhe se në serverë, llogari bankare e portofola elektronikë u gjet gjurma e parave të viktimave.
Pikërisht këtu fillon pjesa që ende nuk është shpjeguar publikisht nga SPAK: çfarë ndodhi me rrethin gjeorgjian që ndërtoi biznese në Shqipëri pranë familjes së Amant Josifit, ndërsa operacioni kriminal i call-centerave po hetohej nga gjysma e Europës?
Më 10 shkurt 2024, SPAK dërgoi për gjykim Adrian Korrikun, Irisa Pucën, Merxhan Çelikun, Endri Bulkun dhe Erlind Cekajn për mashtrim kompjuterik në kuadër të grupit të strukturuar kriminal. Hetimi kishte nisur pas kërkesës së drejtësisë spanjolle dhe më pas Shqipëria ishte futur në një skuadër të përbashkët me Spanjën, Gjermaninë, Suedinë, Finlandën, Letoninë, Ukrainën, Gjeorgjinë e vende të tjera.
Gjatë kontrolleve u sekuestruan rreth 300 kompjuterë e pajisje elektronike, dokumente, para, portofola kriptomonedhash, dokumente identifikimi të shtetasve lituanezë e gjeorgjianë dhe karta bankare të huaja. SPAK deklaroi se provat kishin treguar qartë ekzistencën e një grupi kriminal ku merrnin pjesë shqiptarë dhe të huaj, ndërsa hetimi ndaj personave të tjerë vazhdonte në dosjen e ndarë 301/1.
Në të njëjtën dosje, Amant Josifit, kompanive që administronte dhe familjarëve të tij iu gjetën dhe sekuestruan 2 milion euro, ndërsa ndjekjen penale ndaj tij e morën autoritetet spanjolle. SPAK kishte mbërritur te paratë e Amantit, kishte identifikuar të huajt si pjesë të rrjetit dhe kishte lënë hapur një procedim të posaçëm për njerëzit e tjerë të skemës.
Në njoftimet publike që pasuan, emrat e gjeorgjianëve Revaz Saakadze, George Khetsuriani, Paata Pavliashvili, Tatia Pavliashvili dhe Lela Gelkhvidze nuk u shfaqën si të pandehur apo si subjekte të sekuestrimeve të shpallura nga SPAK. Ndërkohë, dokumentet tregtare i nxjerrin këta njerëz jo në periferi të jetës ekonomike të Tiranës, por në kompani që lidhen drejtpërdrejt me familjen Josifi.
Më 6 maj 2021, gjeorgjiani Revaz Saakadze krijoi Construction 21, kompani ndërtimi të cilën e zotëronte 100%. Dy muaj më vonë futi në kapital George Khetsurianin, një tjetër shtetas gjeorgjian, duke i kaluar 20% të kuotave dhe duke mbajtur vetë 80%; administrator i shoqërisë ishte Paata Pavliashvili.
Vetëm dymbëdhjetë ditë pas krijimit të Construction 21 ishte ngritur Balkan Investment Group, ku kompania e Saakadzes mori 33.3%, ndërsa 66.7% i takonte New Standard, shoqërisë së zotëruar 100% nga Aleksandër Josifi, babai i Amant Josifit, i cili mori edhe administrimin e biznesit të përbashkët.
Pra, teksa hetuesit europianë rindërtonin mekanizmin e call-centerave që vepronin nga Tirana, rrethi i familjes Josifi po ndërtonte kompani të reja me biznesmenë gjeorgjianë. Saakadze kishte shumicën e Construction 21, Khetsuriani ishte ortaku i tij, Paata administronte kompaninë, ndërsa Aleksandër Josifi kontrollonte shoqërinë ku kapitalet e tyre bashkoheshin.
Lidhja u bë edhe më e drejtpërdrejtë një vit më vonë. Më 3 gusht 2022, George Khetsuriani dhe Aleksandër Josifi themeluan Fast Food International, me 73% për gjeorgjianin dhe 27% për babanë e Amantit; Khetsuriani mori edhe administrimin.
Ndërtimi dhe restorantet kishin krijuar kështu dy ura të veçanta biznesi mes të njëjtit grup gjeorgjian dhe familjes Josifi.
Tatia Pavliashvili, kompania e rekrutimit dhe grupi i call-centerave
Një tjetër degë e grupit shfaqet përmes Tatia Pavliashvilit. Në Human Resources Group, kompani e krijuar për rekrutim punonjësish, marketing dhe trajnime në komunikimin me klientët, Tatia arriti në prill 2019 në 43% të kapitalit, ndërsa Ndriçim Sula kishte 16%.
Kompania kërkonte punonjës sipas porosive të klientëve dhe organizonte trajnime për komunikim e shërbim ndaj klientit, pikërisht profilet njerëzore mbi të cilat funksiononte industria e qendrave telefonike. Në dokumentacionin e saj del edhe kontakti me emrin e Arbana Bushajt, personit që në kompaninë APA-LIAISON u vendos administratore dhe e besuar e Amant Josifit.
Ndriçim Sula doli më vonë edhe në dosjen spanjolle. Në korrik 2025 ai u arrestua në Tiranë pasi kërkohej nga Gjykata e Seu d’Urgell për mashtrim të rëndë të kryer në kuadër të një organizate kriminale, ndërsa raportimet mbi dosjen e lidhën me hetimin e call-centerave.
Kështu, Tatia Pavliashvili nuk del vetëm pranë një investitori apo restoranti. Ajo del më herët në një kompani rekrutimi ku ortak ishte një person i kërkuar nga drejtësia spanjolle për mashtrim të organizuar dhe ku gjurma administrative çonte te një prej njerëzve më të afërt të Amant Josifit.
Pas kësaj periudhe, Tatia Pavliashvili shfaqet në një strukturë shumë më të madhe. TP Investment Limited, e regjistruar në Emiratet e Bashkuara Arabe në korrik 2024, mori pronësinë e bizneseve shqiptare të ushqimit të shpejtë, ndërsa në kompaninë e re Fast Food Albania pronari i vetëm ishte pikërisht TP Investment.
Më 7 tetor 2025, Lela Gelkhvidze firmosi në emër të TP Investment vendimin që rriti kapitalin e Fast Food Albania në 395.322.691 lekë, mbi 4 milionë euro. Administratori shqiptar kishte kufizim të shprehur për tërheqjet mbi 10 mijë euro pa miratimin e përfaqësuesit të pronarit të huaj, duke e lënë kontrollin financiar të shumave të mëdha te struktura që vinte nga jashtë.
Fast Food Albania përdorte numrin 0684007***. I njëjti numër ishte regjistruar tre vite më parë te Fast Food International, kompania e George Khetsurianit dhe Aleksandër Josifit, me seli në Gjergji Center, Rruga Murat Toptani.
Aty bashkohen në dokumente dy degët e historisë: George Khetsuriani dhe Aleksandër Josifi në njërën kompani; Tatia Pavliashvili dhe TP Investment në tjetrën; i njëjti sektor, i njëjti numër kontakti dhe i njëjti rreth biznesi.
Vetëm 13 ditë pas vendimit për kapitalin prej 395 milionë lekësh, më 20 tetor 2025, Kompania kosovare KAN njoftoi marrjen e pronësisë së rrjetit KFC Albania. Global Fast Food Albania, operatori i mëparshëm i KFC-së, zotërohej nga TP Investment dhe kishte mbyllur vitin 2024 me 1.44 miliardë lekë xhiro dhe rreth 141 milionë lekë fitim neto, një biznes me rreth 14 milionë euro të ardhura vjetore që kaloi në duar të reja pa u bërë publik çmimi i transaksionit.
Ky është momenti kur qarku i parave merr peshë tjetër. Një grup biznesesh me histori pronësie gjeorgjiane, lidhje të drejtpërdrejta me babanë e Amant Josifit dhe gjurmë që çojnë te rrethi i call-centerave arrin të ndërtojë një aset me dhjetëra milionë euro qarkullim kumulativ, ta kalojë nëpër kompani të huaja dhe, në fund, ta shesë.
Gjermania arriti te drejtuesi gjeorgjian, SPAK mbeti te hallka shqiptare
Gjermania arriti në vitin 2026 te Mikheil Biniashvili dhe e dënoi për operacionin që kishte drejtuar pikërisht nga Shqipëria. Gjykata përshkroi një fabrikë mashtrimi me deri në 600 punonjës, miliona euro të humbura nga qytetarë europianë dhe një program që më pas u shpërnda te qindra platforma të tjera.
SPAK, nga ana e tij, provoi grupin kriminal, identifikoi shqiptarë dhe të huaj, gjeti dokumente gjeorgjiane në qendrat e kontrolluara, sekuestroi mbi 2.2 milionë euro të lidhura me Amant Josifin dhe hapi dosjen 301/1 për pjesën tjetër të rrjetit.
Në krahun e biznesit, ndërkohë, Saakadze, Khetsuriani, Paata dhe Tatia Pavliashvili e Lela Gelkhvidze vazhduan të shfaqeshin në kompani që prekën ndërtimin, rekrutimin, restorantet dhe strukturat e huaja të pronësisë. KFC ndërroi pronar, ndërsa të paktën nga njoftimet publike të drejtësisë shqiptare nuk del një goditje që të ketë ndjekur këtë degë me të njëjtën forcë me të cilën u ndoqën operatorët dhe programuesit.
Këtu qëndron edhe dështimi që kërkon sqarim nga SPAK. Hetimi i një fabrike mashtrimi nuk mund të përfjë te telefoni i operatorit kur paratë e saj kërkojnë ndjekur deri te biznesi, kapitali, prona dhe përfituesi që arkëton në dalje. Dosja shqiptare provoi se viktimat europiane u zhvilluan nga një rrjet me bazë operative në Shqipëri; dosjet e biznesit tregojnë se në të njëjtën periudhë rreth familjes Josifi u ngrit një qark kompanish me ortakë gjeorgjianë.
KFC-ja tashmë është shitur. Milionat e Amant Josifit janë sekuestruar pjesërisht. Një nga drejtuesit gjeorgjianë të industrisë së mashtrimit është dënuar në Gjermani. Pyetja që ka mbetur në Tiranë është se kush i ndoqi milionat që dolën nga call-centerat deri te bizneset ku paratë morën pamjen e kapitalit të rregullt, dhe pse ortakët gjeorgjianë të rrethit Josifi nuk shfaqen në bilancin publik të goditjes së SPAK-ut... /Pamfleti
© Copyright Pamfleti
Ky artikull është material ekskluziv i Pamfleti dhe mbrohet nga e drejta e autorit, në përputhje me Ligjin Nr. 35/2016, “Për të drejtat e autorit dhe të drejtat e lidhura me to”.
Ripublikimi i plotë ose i pjesshëm i këtij shkrimi nga media të tjera lejohet vetëm duke cituar qartësisht Pamfleti si burim dhe duke vendosur në fund të materialit linkun e artikullit origjinal.
Çdo përdorim, kopjim apo ripublikim pa respektuar këto kushte përbën shkelje të së drejtës së autorit dhe mund të sjellë përgjegjësi ligjore sipas legjislacionit në fuqi.gjeorgjianët call center spak amant josifi kfc Lini një Përgjigje Anuloje përgjigjen Dosja e zezë Zbërthehet pronësia e JET Bank/ “Sani”, El Goren, Israel Albania, DON Albania dhe biznesmenët e jahteve pas 28.5% 17 Shtator 2026, 12:1812:18Dosja e zezë Kompania sekrete e skemës “Delvina Gas”: Si lidhen Ron Yeffet, 2 ukrainaset dhe biznesmeni ruso-izraelit 16 Shtator 2026, 20:5520:55Dosja e zezë “Punë oligarkësh”, apo jo z.zëvendësministër? 15 Shtator 2026, 19:1519:15Dosja e zezë Ron Yeffet, “ustai” i aferave strategjike: Si u fut Sinan Idrizi, “leva” e Ramës, në lojën e Air Albania 14 Shtator 2026, 23:2823:28Dosja e zezë Miku i Ramës në syrin e ciklonit, hapet “Kutia e Pandorës” për ‘jeniçerin’ e 4iG! 12 Shtator 2026, 21:3021:30Dosja e zezë Shqipëria, bazë e rrjeteve mafioze Izrael-Ukrainë: çmimi i karriges së Ramës në tavolinën globale 12 Shtator 2026, 12:3512:35Dosja e zezë