Jared Kushner dhe Artur Shehu Në qershor SPAK siguroi urdhrin e një gjyqtari për arrestimin e Shehut dhe 19 anëtarëve të tjerë, pjesë e një rrjeti të madh droge në Europë. Banorët e Zvërnecit u tronditën dy vjet më parë kur Jared Kushner publikoi pamje të projektuara të një resorti të planifikuar mesdhetar në një gadishull të ngushtë, të rrethuar nga deti i kaltër dhe një lagunë ku mblidhen flamingot.
Pamjet tregonin një rrip toke ku prindërit dhe gjyshërit e tyre dikur kultivonin patate. Fshatarët pretendonin se prona u ishte vjedhur në vitet 2000 nga Artur Shehu, një gangster i dyshuar që u arratis në Miami pas një shkëmbimi zjarri në lokalin e tij.
Kështu që ata i shkruan një letër Kushnerit, duke i thënë se prej gati dy dekadash ishin të përfshirë në mosmarrëveshje gjyqësore me Shehun dhe duke u kërkuar zhvilluesve të mos vazhdonin. Zona, shkruan ata, është “në pronësi të fshatit dhe banorëve të tij”.
Në vend të kësaj, një grup zhvillimi i mbështetur nga Kushner vazhdoi përpara dhe i pagoi Shehut mbi 120 milionë dollarë për tokën në fillim të këtij viti. Dy muaj më vonë, prokurorët shqiptarë kërkuan arrestimin e Shehut për rolin si drejtues në një operacion të gjerë ndërkombëtar të trafikut të drogës, i cili sillte kokainë nga Amerika e Jugut në Evropë në ngarkesa me qymyr druri dhe pastë frutash.
Shehu pastroi para përmes pronave, përfshirë Zvernecin, që ishin vjedhur duke përdorur metoda të tilla si falsifikimi i dokumenteve të tokës të periudhës osmane, thanë prokurorët.
Polemika është goditja më e fundit për ambiciet e Kushnerit në pasuritë e paluajtshme jashtë vendit, një pjesë e karrierës së biznesit pas vitit 2020, të cilën ai e nisi pas administratës së parë Trump.
Ndërsa pjesa më e madhe e investimeve të tij është bërë përmes fondit prej 6 miliardë dollarësh të kapitalit privat, të mbështetur nga fondet sovrane të vendeve të Gjirit, Kushner iu rikthye gjithashtu rrënjëve të tij në pasuritë e paluajtshme. Ai foli për mundësinë e pozicionimit përpara valës së investimeve duke zhvilluar projekte në Ballkan, ku turizmi dhe çmimet e pronave po rriten, duke synuar Serbinë dhe Shqipërinë.
Ai arriti një marrëveshje pa tender me qeverinë e Serbisë për të zhvilluar tokë shtetërore në qendër të Beogradit, duke nxitur kritika lokale se qeveria e Serbisë po përpiqej të afrohej me Trumpin, akuzë të cilën qeveria e mohoi.
Planet në Serbi u rrëzuan pas javësh protestash dhe ngritjes së akuzave ndaj një ministri të kabinetit që kishte shtyrë përpara miratimet e projektit. Kushner u tërhoq në dhjetor.
Projekti në Shqipëri, në Zvernec, ka shkaktuar një reagim më të madh popullor. Një video që tregonte rojet private të grupit të mbështetur nga Kushner duke goditur me grushte një banor vendas dhe duke e tërhequr zvarrë nëpër një plazh shkaktoi protesta të mëdha të përditshme në Tiranë. Ato kanë vazhduar për më shumë se dy muaj, ndërsa protestuesit i kanë zgjeruar kritikat e tyre edhe ndaj korrupsionit endemik dhe zhvillimit të pakontrolluar, në një lëvizje që ata e quajnë Revolucioni i Flamingove.
Ndryshe nga Serbia, këtu paratë tashmë kanë kaluar nga njëra palë te tjetra. Grupi i zhvillimit i mbështetur nga Kushner u pagoi pronarëve privatë të tokave, përfshirë Shehun, shumë më tepër se 240 milionë dollarë, sipas një personi në dijeni të shitjeve.
Avokati i Shehut, Kujtim Cakrani, thotë se Shehu nuk është as trafikant droge dhe as hajdut tokash dhe se ai nuk ka pasur kurrë marrëdhënie të drejtpërdrejta me Kushnerin, duke vepruar vetëm përmes një ndërmjetësi.
“Ai nuk ka absolutisht asnjë lidhje me akuzat. Ai është thjesht një pronar toke, që vjen nga një familje e madhe pronarësh tokash dhe kontaktet e tij me të tjerët në aktakuzë kishin të bënin vetëm me marrëveshje të ligjshme biznesi."-tha Cakrani.
Një zëdhënës i grupit të zhvillimit , tha se sistemi ligjor shqiptar është “vendi i duhur për zgjidhjen e çështjeve në lidhje me pronësinë e tokës dhe integritetin e transaksioneve të mëparshme”.
Grupi është në dijeni të pretendimeve “në lidhje me shitësin e tokës” dhe vetë nuk është objekt i ndonjë hetimi, tha ai, duke shtuar: “Ne vazhdojmë të besojmë se blerjet fillestare të tokës janë kryer në mënyrë të ligjshme”.
Prokurorët thonë se kanë ngrirë paratë e Shehut nga shitja.
“Teorikisht, gjykatat kanë autoritetin për të bllokuar përkohësisht zhvillimin e kontestuar. Në praktikë, gjykatat nuk janë plotësisht të pavarura nga politika dhe interesat e fshehura ekonomike.", tha Sotir Dhamo, profesor i planifikimit urban në Universitetin Polis në Tiranë, duke iu referuar pronave të kontestuara që përballen me zhvillim. Kush është Artur Shehu?
Shehu, 60 vjeç, jeton sot në Miami, ku të dhënat e pronësisë tregojnë se ai zotëron, së bashku me gruan e tij, një ish-personazh të televizionit shqiptar, një shtëpi prej 4,000 këmbësh katrorë me kolona në Flamingo Drive, Miami Beach.
Rruga e tij drejt Floridës së Jugut kalon përmes disa dekadave veçanërisht të trazuara në Shqipërinë e tij të lindjes.
E izoluar dhe e varfër gjatë Luftës së Ftohtë, kur qeveria e saj u prish si me Bashkimin Sovjetik ashtu edhe me Kinën, Shqipëria nuk pati një fat shumë më të mirë gjatë viteve 1990 pas komunizmit. Vendi u trondit nga paqëndrueshmëria politike, krimi i organizuar, shpopullimi dhe një skemë masive piramidale që pothuajse e zhyti vendin në luftë civile.
Mes kaosit, Shehu u shfaq si një sipërmarrës, pronat e të cilit përfshinin një hotel në qytetin e trazuar të Vlorës.
"Ai tërhoqi vëmendjen e policisë shqiptare kundër drogës dhe të autoriteteve italiane, të cilat dyshonin se ai bashkëpunonte me mafian italiane, duke trafikuar marihuanë dhe duke kontrabanduar me skafe emigrantë të mundshëm drejt Italisë. Një ditë në vitin 1999, policia nxitoi drejt një lokali pas raportimeve për të shtëna me armë. Ata mësuan se Shehu ishte përfshirë në një shkëmbim zjarri me një bandë rivale. Pas kësaj, Arturi u zhduk", tha Dritan Zagani, një nga ish-oficerët e Policisë së Shtetit shqiptar që e hetoi atë.
Cakrani, avokati i Shehut, tha se Shehu ishte sulmuar nga banda prokomuniste për shkak të pikëpamjeve të tij antikomuniste. Hetimet e organeve të zbatimit të ligjit ishin të motivuara politikisht, tha ai.
As hetimet italiane dhe as ato shqiptare nuk çuan në ngritjen e akuzave. Shehu u rishfaq në Miami. Ai u transferua në SHBA në vitin 2001 dhe fitoi azil pasi përmendi sulmet nga bandat komuniste, të cilat i vranë xhaxhain dhe vëllain, tha Cakrani.
Në fund ai mori shtetësinë amerikane, tha Cakrani, por vazhdoi të mbante lidhje me Shqipërinë, duke zgjeruar një portofol pronash të paluajtshme.
Shehu ra përsëri në vëmendjen e organeve të zbatimit të ligjit në vitin 2012, kur prokurorët italianë kërkuan arrestimin e tij në një çështje më të gjerë kundër një familjeje kriminale italiane. Shehu ishte bashkëpronar i një xhelaterie në Shqipëri me një bos të mafias italiane, i cili i transferoi Shehut mbi 1 milion euro (afërsisht 1.3 milionë dollarë në atë kohë), sipas një vendimi të një gjykate italiane. Shehu gjithashtu i kishte dhënë me qira hapësirë në një ndërtesë për një kazino, thanë prokurorët.
Gjykatësi italian e refuzoi kërkesën për arrestim, duke thënë se nuk kishte prova të mjaftueshme për të treguar se Shehu ishte i lidhur me ndonjë veprimtari të paligjshme. Cakrani tha se përfshirja e Shehut ishte vetëm në cilësinë e pronarit.
Megjithatë, ai vazhdoi të shfaqej në hetime për drogën. Organet evropiane të zbatimit të ligjit, gjatë operacioneve të survejimit, e panë atë në Monako me trafikantë të dyshuar narkotikësh, thanë prokurorët shqiptarë. Ata siguruan fotografi të tij në vitin 2019 në Majorka, në një takim përkrah një bosi të dyshuar të nivelit të lartë të mafias, i cili që atëherë është arrestuar. Shehu nuk u akuzua në këto hetime. Avokati i tij tha se Shehu nuk ka pasur probleme ligjore me asnjë vend evropian përveç Shqipërisë dhe se ai ishte përfshirë vetëm në marrëveshje të ligjshme biznesi.
Fati i tij ndryshoi në qershor.
Hetuesit evropianë të drogës në Spanjë, Belgjikë dhe disa vende të tjera i dorëzuan dosje voluminoze Prokurorisë së Posaçme shqiptare të njohur si SPAK, një strukturë e krijuar në vitin 2019 pjesërisht për të adresuar shqetësimet e Bashkimit Evropian për korrupsionin në Shqipëri. Ky është një problem i përhapur: gjatë katër viteve të fundit, prokurorët e SPAK-ut kanë ngritur akuza për korrupsion ndaj dy ish-kryeministrave, dy ish-zëvendëskryeministrave dhe shumë ish-ministrave të kabinetit, të gjithë të cilët i kanë mohuar akuzat. Të pajisur me dosjet e hetuesve evropianë, në qershor SPAK siguroi urdhrin e një gjyqtari për arrestimin e Shehut dhe 19 anëtarëve të tjerë, pjesë e një rrjeti të madh droge në Europë.
Shehu kishte një “pozicion drejtues brenda organizatës”, thanë prokurorët, duke e akuzuar për pastrim parash dhe pjesëmarrje në një grup të strukturuar kriminal, të ngjashëm me krimin e organizuar sipas legjislacionit amerikan.
Rrjeti i dyshuar i drogës shtrihej në të gjithë zinxhirin e furnizimit me kokainë: anëtarët e rrjetit shqiptar mbikëqyrnin prodhimin në Ekuador, vendosnin ngarkesat e kokainës në anije të fshehura mes frutave, sojës, sheqerit dhe produkteve të tjera, i drejtonin ato përmes porteve holandeze, përpunonin drogën në fabrika të vogla dhe e shpërndanin në të gjithë Evropën, thanë prokurorët.
Fitimet nga kokaina arrinin në Shqipëri përmes kriptomonedhave dhe parave të gatshme të kontrabanduara me autobusë, ndërsa grupi përfundimisht pastronte fitimet përmes pasurive të paluajtshme shqiptare, thanë prokurorët. Disa prej tyre përfunduan duke financuar një rrokaqiell të kuq në formë kutie në qendër të Tiranës, kryeqytetit të Shqipërisë, dhe vila bregdetare, thanë prokurorët. Shehu dhe personat që vepronin në emër të tij ishin thelbësorë për këtë përpjekje, thanë prokurorët.
Cakrani tha se Shehu kreu vetëm transaksione të ligjshme të pasurive të paluajtshme dhe nuk ishte i përfshirë në pastrim parash apo në ndonjë nga krimet e tjera të pretenduara.
Mes akuzave të prokurorëve: Shehu dhe rrjeti i tij siguruan tokë të përdorur për pastrimin e parave të drogës duke pretenduar pronësi historike, shpesh duke u mbështetur në dokumente të falsifikuara. Një nga sipërfaqet më të mëdha që përmendën prokurorët: toka në Zvernec, vendi që Kushner dëshiron të zhvillojë.
“Një problem psikologjik”
Fshati i vogël i Zvernecit ndodhet në bregdet jashtë Vlorës, i njohur për manastirin e tij të epokës bizantine, më shumë se 700-vjeçar, në skajin e Lagunës së Nartës. Shtëpitë janë të grumbulluara në një kodër që ofron pamje nga deti dhe pemë të mbushura me fiq dhe shegë.
Zoi Pula, 71 vjeç, u rrit në fshat përpara se të transferohej në Greqi, ku kishte më shumë mundësi pune. Ai kthehet gjatë verës në shtëpinë e familjes së tij në kodër.
"Stërgjyshi i tij u vendos në fshat dhe përdorte një copë tokë në gadishullin aty pranë për kullotje", tha ai.
Kur prona u kolektivizua, familja e tij e përdori tokën për të kultivuar patate, qepë dhe kultura të tjera. Pasi qeveria komuniste ra në vitin 1991, familjes së tij iu dha pronësia e pjesës së saj të tokës bujqësore në gadishull, e cila që atëherë kishte mbetur djerrë.
Në mesin e viteve 2000, tha ai, mësoi atë që njëri pas tjetrit kishin zbuluar edhe fshatarët e tjerë: zyrtarët lokalë të pronave i kishin dhënë Shehut kontrollin e tokës së tyre në gadishull.
“U çmendëm. U zemëruam. Ishte një problem psikologjik”, tha ai.
Pronësia e pasurive të paluajtshme në Shqipëri ka qenë problematike për dekada. Pas rënies së komunizmit, qeveria e re hartoi një seri ligjesh për kthimin e tokave të shpronësuara, duke hapur rrugën për një valë pretendimesh që mbivendoseshin. Ato përfunduan në sistemin e dobët gjyqësor të vendit, ku autoritetet kanë zbuluar raste të shumta korrupsioni.
Ndërsa ndiqnin çështjen e tyre, fshatarët dhe të tjerët që pretendonin pronësinë zbuluan se Shehu kishte përdorur taktika të ngjashme për të grumbulluar pjesën më të madhe të tokës në Zvernec: përmes një avokati, ai përdori dokumente historike për të treguar se paraardhësi i tij Seit Shehu kishte qenë më parë pronar i pronës.
Një pjesë e tokës u sigurua nga një prej avokatëve të Shehut në vitin 2007 duke u paraqitur zyrtarëve të pronësisë një dokument të përkthyer gabimisht të tokës nga periudha osmane. Gjatë përkthimit nga turqishtja osmane, një arkivist zëvendësoi pronarin origjinal dhe vendosi në vend të tij emrin e Seit Shehut, konstatoi një gjykatë. Avokati dhe arkivisti u dënuan më vonë për akuza të lidhura me falsifikimin e dokumenteve, megjithëse çështja e avokatit po rigjykohet.
“Falsiteti i këtij dokumenti është provuar”, vendosi Gjykata e Lartë e Shqipërisë.
Shehu dhe pretendues të shumtë të tokës kanë shkëmbyer fitore në gjyqe dhe apelime të ndryshme, asnjë prej të cilave nuk e detyroi Shehun të hiqte dorë nga toka. Rigjykimet dhe apelimet po vazhdojnë nëpër sistem.
Lidhur me këtë, Cakrani tha se pretendimet e Shehut bazohen në dokumentacion të konsiderueshëm që tregon se familja e tij ishte një pronare e madhe tokash, në Zvernec dhe gjetkë. Provat e paraqitura në çështjet gjyqësore përfshijnë dokumente të shumta nga pushtimi fashist italian dhe të tjera nga fillimi i viteve 1900.
“Ka dokumente të ligjshme që provojnë se kjo është toka e tij”, tha ai.
Tela me gjemba
Kushner dhe gruaja e tij Ivanka Trump u interesuan për herë të parë për Shqipërinë gjatë një udhëtimi me jaht nëpër Mesdhe pas mandatit të parë të Trumpit, duke hedhur spirancën gjatë rrugës mes Malit të Zi dhe Greqisë. Ata eksploruan ishullin e Sazanit, në pronësi publike, një ish-zonë ushtarake ku vendasit shkojnë me varkë për udhëtime njëditore.
“Notuam deri në ishull. Bëmë një shëtitje. Thjesht u magjepsëm.”, tha ajo në një podcast në maj. Kushner më vonë arriti një marrëveshje me kryeministrin Edi Rama për të zhvilluar Sazanin dhe nisi të punonte mbi planet me Asher Abehsera, një zhvillues me bazë në SHBA, i cili kishte qenë partneri i Kushnerit në rizhvillimin e zyrave në Brooklyn gjatë viteve 2010.
Pak më vonë, tha Abehsera në një intervistë në qershor, dyshja e drejtoi vëmendjen drejt brezit të pazhvilluar të tokës 5 milje larg, në bregun e Zvernecit. Atje, vendasit shkojnë me automjete 4x4 për të pushuar në plazhe të paprekura, ku breshkat e detit bëjnë foletë dhe delet kullosin.
Atë pranverë, Kushner publikoi në Instagram pamje të projektuara të planeve, me vila të gdhendura në faqen e shkëmbit në Sazan dhe hotele përgjatë plazheve të Zvernecit.
Muaj më vonë, në shtator 2024, një grup fshatarësh i dërgoi letrën e tyre kompanisë së Kushnerit, duke i kërkuar zhvilluesit të përmbahej “nga ndërmarrja e veprimeve që cenojnë të drejtat reale të pronësisë së fshatit” ndërkohë që mosmarrëveshjet vazhdonin.
Në atë kohë, mosmarrëveshjet për tokën në Zvernec në lidhje me zonën ishin të njohura në nivel lokal dhe ishin mbuluar vazhdimisht nga shtypi.
“Ne nuk kemi interes të zhvillojmë asgjë që nuk është me të drejtë ose ligjërisht e jona për t’u zhvilluar”, i tha Abehsera Journal në vitin 2024 kur u pyet për mosmarrëveshjet.
Pasi iu dërgua një listë me katër pronarë tokash, përfshirë Shehun, Abehsera tha se “asnjëri prej këtyre nuk është partneri ynë”, në një mesazh të vitit 2024 për Journal.
Kushner dhe Abehsera i përpunuan më tej planet, duke formuar një sipërmarrje të quajtur Sazan Real Estate Development.
Në projekt u përfshi gjithashtu një grup i madh investimesh nga Katari, i drejtuar nga familja Al-Khayyat.
Kushner u takua me familjen Al-Khayyat në Kupën e Botës 2022 dhe përfundimisht iu drejtua atyre si partnerë, pasi familja ka përvojë në zhvillimin e resorteve ishullore në Maldive dhe në Gjirin Persik.
Grupi i zhvillimit, duke përdorur një subjekt të quajtur Albania Land Development, i pagoi Shehut 110 milionë euro, ekuivalente me 125 milionë dollarë, për tokën e tij në prill, thanë prokurorët në çështjen e pastrimit të parave kundër Shehut. Të dhënat e korporatave shqiptare tregojnë se subjekti është në pronësi të Sazan Real Estate Development.
Në fund të prillit, grupi i mbështetur nga Kushner vendosi gardhe ndërtimi në skajet e gadishullit të mbrojtur mjedisor, duke i veshur ato me rrotulla teli me gjemba.
Kur vendasit u paraqitën për të protestuar, rojet e sigurisë të punësuara bllokuan zonën. Njëri goditi me grusht në fyt një banor vendas dhe më pas e tërhoqi zvarrë nëpër një plazh, ndërsa policia aty pranë shikonte.
Grupi i zhvillimit i dënoi publikisht veprimet, duke ia atribuar ato një kontraktori sigurie të paidentifikuar.
Por një video e incidentit u bë virale. Zemërimi u përhap dhe protestuesit nisën të mbushnin qendrën e Tiranës duke mbajtur pankarta me imazhet e Kushnerit, flamingove dhe Trumpit. Disa ditë më vonë, ngritja e akuzave ndaj Shehut u raportua në mediat shqiptare, duke sjellë më shumë njerëz në rrugë.
Pak më vonë, Abehsera, kryetari i Sazan Real Estate, e distancoi grupin e tij nga polemika. Ai i tha Journal në qershor se nuk e dinte nëse kompania e tij i kishte paguar Shehut për tokën. Ai mohoi gjithashtu se kishte dijeni më parë për konfliktet mbi tokën. “Ne nuk pamë dhe nuk dëgjuam fare për ndonjë mosmarrëveshje”, tha ai.
Grupi aktualisht po punon për një dokument të vlerësimit mjedisor, një parakusht për miratimet e qeverisë përpara ndërtimit. Pavarësisht një reagimi kundërshtues që ka përfshirë dhjetëra mijëra protestues, zyrtarë të Bashkimit Evropian dhe personazhe të njohura si Dua Lipa, projekti ka mbështetje të fortë nga kryeministri shqiptar Edi Rama. Ai e vlerëson projektin prej 5 miliardë dollarësh si një investim të rëndësishëm të huaj që do të nxisë ekonominë./ Përshtati "Pamfleti", nga "The Wall Street Journal"artur shehu kushner Lini një Përgjigje Anuloje përgjigjen Aktualitet Fluks emigrantësh edhe në Morinë, mbi 19 mijë persona hyjnë në Shqipëri në vetëm 3 orë 9 Gusht 2026, 12:0812:08Aktualitet Durrësi dhe Vlora nën fluksin e gushtit, mijëra pasagjerë dhe automjete në porte 9 Gusht 2026, 11:5011:50Aktualitet 36 orë në “ferrin” e flakëve, zjarrfikësi i Krujës: Në 11 vite, kurrë s’kam parë diçka të tillë! 9 Gusht 2026, 11:3611:36Aktualitet Mijëra persona drejt Shqipërisë, Kakavija regjistron fluks të lartë në 24 orët e fundit 9 Gusht 2026, 11:2911:29Aktualitet Zelensky 'i krehu bishtin' Vuçiçit me deklaratën për Kosovën, Tirana zyrtare: Paralelizëm i gabuar! 9 Gusht 2026, 11:1111:11Aktualitet Plazhi dhe pishinat shtojnë infeksionet e veshit, mjekët: Mbi 20 raste çdo ditë 9 Gusht 2026, 10:5610:56Aktualitet