Hetimi për shpërthimin tragjik në rrugën Lysikratous, në zonën e Plakës në Athinë, ku humbën jetën tre shqiptarë dhe tre persona të tjerë, është përqendruar edhe te ndërtesa që u shemb pas ngjarjes. Objekti ishte ndërtuar me leje në vitin 1979 dhe nuk ishte i klasifikuar si monument apo ndërtesë e mbrojtur. Ekspertët po shqyrtojnë nëse standardet teknike të kohës dhe karakteristikat strukturore të godinës kanë ndikuar në përmasat e dëmeve dhe në shembjen e saj.
Në fokusin kryesor të hetimeve mbetet një apartament në katin e dytë, ku dyshohet se mund të ketë pasur rrjedhje të gazit natyror. Megjithatë, autoritetet greke ende nuk kanë dalë në një përfundim zyrtar për shkakun e shpërthimit. Sipas ekspertit Lefteris Avramidis, ndërtesat e ndërtuara në atë periudhë mund të kenë karakteristika të ndryshme strukturore, përfshirë përdorimin e çelikut të butë, elementë fiksues më të rrallë dhe trashësi më të vogla të pllakave e kolonave, faktorë që po analizohen në raport me fuqinë e shpërthimit.
Në vijim, hetuesit do të shqyrtojnë dokumentacionin teknik të ndërtesës, projektin, materialet e përdorura dhe dëmet e shkaktuara nga shpërthimi, për të përcaktuar nëse shembja ishte pasojë vetëm e forcës së shpërthimit apo nëse godina kishte edhe dobësi të mëparshme. Ngjarja ka rikthyer në vëmendje sigurinë e ndërtesave të vjetra në zonat e dendura urbane të Athinës, ndërsa ekspertët kanë propozuar edhe kontrolle më sistematike dhe instalimin e detektorëve të gazit në objektet që përdorin gaz natyror.