Shtetet e Bashkuara kanë përdorur pothuajse 80% të raketave të sistemit të mbrojtjes ajrore THAAD dhe rreth gjysmën e raketave interceptuese Patriot gjatë konfliktit me Iranin, ndërsa komandantët më të lartë ushtarakë kanë paralajmëruar se rezervat e municioneve të Pentagonit kanë rënë në nivele “të rrezikshme”. Lajmi bëhet i ditur nga CNN, duke cituar burime të njohura me raportet e brendshme të ushtrisë amerikane.
Sipas burimeve, mungesa e raketave mbrojtëse ishte një nga faktorët që ndikoi në vendimin e presidentit amerikan Donald Trump për të pezulluar sulmet e reja ndaj Iranit gjatë fundjavës, pavarësisht se operacioni ushtarak kishte marrë fillimisht miratimin e tij.
Raportohet se sekretari i Mbrojtjes, Pete Hegseth, kishte marrë urdhrin për të vijuar me një seri sulmesh të reja, por Trump ndryshoi qëndrim pas konsultimeve me aleatët në Lindjen e Mesme.
Sipas zyrtarëve amerikanë, vendet e Gjirit Persik shprehën shqetësimin se një përshkallëzim i konfliktit mund t’i ekspozonte ndaj sulmeve hakmarrëse iraniane, veçanërisht ndaj infrastrukturës së tyre energjetike.
Burimet theksojnë se disa nga këto vende mbështeten te sistemet amerikane të mbrojtjes ajrore dhe se mungesa e raketave mund të kufizojë aftësinë e tyre për t’u mbrojtur nga sulmet me raketa dhe dronë.
Përveç sistemit THAAD, ushtria amerikane ka konsumuar edhe një pjesë të konsiderueshme të raketave Patriot, Tomahawk, ATACMS dhe Precision Strike Missile (PrSM). Sipas raportit, rezervat e raketave Tomahawk janë reduktuar pothuajse përgjysmë, ndërsa janë përdorur pothuajse të gjitha raketat tokë-ajër me rreze të gjatë veprimi.
Ekspertët paralajmërojnë se këto mungesa mund të ndikojnë jo vetëm në operacionet kundër Iranit, por edhe në aftësinë e SHBA-së për t’u përballur me konflikte të mundshme në të ardhmen me Kinën, Rusinë apo Korenë e Veriut. Sipas Qendrës për Studime Strategjike dhe Ndërkombëtare (CSIS), përpara nisjes së luftës me Iranin, SHBA kishte rreth 452 raketa THAAD dhe afro 2.200 raketa Patriot të gjeneratës më të avancuar. Me ritmet aktuale të prodhimit, rikthimi i rezervave të THAAD në nivelet e mëparshme mund të zgjasë të paktën tre vjet.
Analistët theksojnë se industria amerikane e mbrojtjes po përpiqet të rrisë prodhimin. Pentagoni ka nënshkruar së fundmi kontrata të reja për zgjerimin e prodhimit të raketave Patriot dhe THAAD, megjithatë zyrtarët pranojnë se rezultatet nuk do të jenë të menjëhershme.
Nga ana tjetër, Pentagoni dhe Shtëpia e Bardhë mohojnë se mungesa e municioneve cenon aftësinë ushtarake të SHBA-së.
Zëdhënësi i Pentagonit, Sean Parnell, deklaroi se ushtria amerikane mbetet “forca më e fuqishme në botë” dhe disponon kapacitetet e nevojshme për të zbatuar çdo urdhër të presidentit.
Edhe zëdhënësja e Shtëpisë së Bardhë, Anna Kelly, u shpreh se ushtria amerikane ka “më shumë se mjaftueshëm municione dhe rezerva” për të përmbushur objektivat strategjikë të administratës Trump, duke shtuar se prodhimi i armëve amerikane po zgjerohet vazhdimisht.
Megjithatë, sipas burimeve të CNN, vlerësimet e brendshme të ushtrisë vazhdojnë të ngrenë shqetësime serioze për ritmin me të cilin po shterojnë rezervat e raketave dhe kohën e gjatë që do të nevojitet për t’i zëvendësuar ato. Top Channel