Giovanni Sartori ishte në tribunat e stadiumit në San Marino për të ndjekur nga afër ndeshjen e Ligës së Kombeve mes San Marinos dhe Shqipërisë. Drejtori teknik i Bolognës nuk ishte aty rastësisht. Sipas një raportimi ekskluziv, prania e tij në San Marino lidhet me vëmendjen e klubit italian ndaj tregut shqiptar dhe, në veçanti, me situatën e Elseid Hysajt. Mbrojtësi kuqezi, i cili nuk u aktivizua në ndeshjen ndaj San Marinos, është ofruar te Bologna si një alternativë për krahun e djathtë të mbrojtjes.
Por Hysaj nuk është aktualisht zgjedhja e parë e klubit. Prioriteti i Bolognës mbetet Matteo Darmian, me klubin italian që pritet të marrë vendimin përfundimtar gjatë kësaj jave. Nëse marrëveshja për Darmian nuk realizohet, atëherë Hysaj mund të shndërrohet në Planin B të Bolognës.
Fakti që Sartori ndodhej në San Marino për ndeshjen e Shqipërisë e bën situatën edhe më interesante. Drejtori teknik i Bolognës kishte mundësinë të ndiqte nga afër disa prej lojtarëve kuqezi, ndërsa Hysaj është pikërisht një prej emrave që lidhet me klubin italian. Për Hysajn, një rikthim në Serie A do të ishte një tjetër kapitull në karrierën e tij në Itali. Mbrojtësi shqiptar e njeh shumë mirë kampionatin, pasi ka luajtur për Empolin, Napolin dhe Lazion, përpara se të vijonte karrierën jashtë Italisë.
Tashmë gjithçka varet nga vendimi për Darmian. Nëse Bologna nuk arrin ta mbyllë marrëveshjen me mbrojtësin italian, Hysaj mund të dalë në plan të parë. Dhe prania e Sartorit në San Marino, pikërisht në një ndeshje të Shqipërisë, i jep edhe më shumë interes kësaj piste. Top Channel