Pamje nga Protesta / Kontrolle, bastisje dhe ndalime të të miturve, edhe kur nuk u është atribuuar asnjë vepër penale. Nga Roma në Milano, studentët dhe familjet denoncojnë presionin policor, ndërsa juristët paralajmërojnë për rrezikun e kriminalizimit të çdo forme kundërshtimi.
Identifikime, kontrolle trupore dhe ndalime për orë të tëra në komisariat. Ky është realiteti me të cilin po përballen gjithnjë e më shumë të rinj në Itali, përfshirë edhe fëmijë 13-vjeçarë, të cilët dalin për të marrë pjesë në protesta.
Sipas dëshmive të studentëve dhe familjarëve të tyre, në shumë raste këto masa janë ndërmarrë pa u konstatuar akte dhune, pa u evidentuar vepra penale dhe madje përpara se të niste marshimi.
Në këtë klimë, po përhapet gjithnjë e më shumë perceptimi i të miturit si kërcënim për rendin publik. Retorika politike dhe zgjerimi i kompetencave të policisë, përfshirë mundësinë e ndalimit parandalues, po ngrenë pikëpyetje për kufijtë e ndërhyrjes shtetërore dhe respektimin e të drejtave kushtetuese.
Përdorimi i masave shtrënguese ndaj të rinjve, që dikur mund të konsiderohej përjashtim, sipas organizatave studentore po shndërrohet në një praktikë gjithnjë e më të zakonshme. Gjatë fundjavës së 24 dhe 25 tetorit, në Romë u regjistruan disa raste që pasqyrojnë këtë situatë. Francesca Palma, përfaqësuese e Rrjetit të Studentëve të Shkollave të Mesme të Romës, tregon se disa të rinj u ndaluan nga policia në stacionet e metrosë, ndërsa po shkonin të merrnin pjesë në protestat kundër rritjes së kostos së jetesës dhe riarmatimit.
“Disa prej tyre u ndaluan dhe u kontrolluan vetëm sepse mbanin mbrojtëse për qafën ose doreza. Nuk ishin as pjesë e organizatave studentore. Ishin thjesht të rinj që kishin vendosur të dilnin spontanisht në protestë”, rrëfen Palma.
Mes të rinjve të ndaluar ishte edhe Carolina, një nxënëse e vitit të fundit të gjimnazit në Romë, historia e së cilës u bë publike nga gazeta “La Repubblica”. Ajo u ndalua në stacionin e metrosë Lepanto, u kontrollua dhe u identifikua, përpara se të shoqërohej në komisariat me sirena të ndezura.
Atje u mbajt për disa orë, pa iu dhënë, sipas dëshmisë së saj, një shpjegim i qartë për arsyet e ndalimit. “Mbaja vetëm një bluzë të zezë”, tha Carolina, duke iu referuar veshjes së saj.
Rasti shkaktoi reagime politike. Matteo Renzi, kreu i partisë Italia Viva, e cilësoi ndalimin shqetësues, duke pretenduar se vajza ishte mbajtur pa arsye dhe në kundërshtim me Kushtetutën. Deputetja e së njëjtës parti, Marianna Madia, njoftoi se do të paraqiste një interpelancë parlamentare për këtë çështje.
Por, sipas përfaqësuesve të studentëve, rasti i Carolinës nuk është i izoluar. Në gjimnazin Giordano Bruno, po në Romë, policia hyri në ambientet e shkollës gjatë një okupimi studentor dhe tentoi të shoqëronte disa nxënës. Shokët e tyre ndërhynë për të penguar largimin e tyre.
“Represioni është në nivele shumë të larta, por ne do të vazhdojmë të rezistojmë dhe të protestojmë pa frikë”, thotë Palma. Raste të ngjashme janë raportuar edhe në qytete të tjera italiane.
Gjatë fundjavës së 24 dhe 25 tetorit, sipas të dhënave të cituara në raportim, u ndaluan 110 të mitur, një pjesë e madhe e tyre në Milano. Kjo ndodhi megjithëse, ndryshe nga fundjava e mëparshme, në qytet nuk u regjistruan incidente të krahasueshme që të vinin në rrezik rendin publik.
Ndërsa në Bolonjë, një vajzë pak më e madhe se 18 vjeç u godit nga një autobot uji i policisë dhe pësoi dëmtime shumë të rënda në njërin sy. Në provincën e Varezes, prefektura shpërndau një qarkore për të shtuar mbikëqyrjen rreth institucioneve arsimore.
Vendimi u kritikua nga organizatat studentore, të cilat shprehën shqetësimin për trajtimin e shkollave si hapësira që kërkojnë mbikëqyrje të posaçme policore. Në të njëjtën zonë u raportuan edhe raste identifikimi dhe kontrolli të të miturve.
Shqetësimin e kanë ngritur edhe prindërit e nxënësve të gjimnazit Pio Albertelli, pranë stacionit Termini në Romë. Në një deklaratë publike, ata denoncuan trajtimin e fëmijëve 13 dhe 14-vjeçarë, të cilët, sipas dëshmive të përcjella prej tyre, ishin ndaluar teksa shkonin në protestë.
“Djem dhe vajza që kishin dalë thjesht nga shtëpia për të marrë pjesë në demonstratë, kanë treguar se janë kërcënuar pa arsye nga policët, janë mbajtur në komisariat dhe janë frikësuar me pretendimin se mund të qëndronin aty deri në 24 orë. Në disa raste, prindërit nuk janë njoftuar, megjithëse këtë e parashikon ligji”, thuhet në deklaratë.
Prindërit i cilësuan këto veprime si abuzim me pushtetin dhe kërkuan që të sqarohen arsyet ligjore të ndalimeve dhe mënyra se si janë trajtuar të miturit.
Edhe juristi Giandomenico Caiazza, ish-president i Dhomave Penale Italiane, paralajmëron se një përgjigje e mbështetur vetëm te represioni është e pamjaftueshme, veçanërisht kur bëhet fjalë për të mitur.
Sipas tij, është e nevojshme të shqyrtohen shkaqet që po nxisin tensionet dhe të bëhet dallimi mes akteve konkrete të dhunës dhe ushtrimit të së drejtës për të protestuar.
Caiazza pranon se përhapja e episodeve të dhunshme mes të miturve është një problem që nuk duhet mohuar.
Megjithatë, ai thekson se kjo nuk justifikon trajtimin e çdo manifestimi kundërshtimi si veprimtari kriminale.“Vërej një prirje për të kriminalizuar çdo formë të shprehjes së mospajtimit. Ky është një fakt alarmues. Çdo gjë po futet në të njëjtën kategori dhe po paraqitet si sjellje e dhunshme ose e paligjshme. Edhe zaptimet e shkollave i kemi përjetuar të gjithë gjatë jetës sonë. Ato janë forma të shprehjes së opinioneve, pikëpamjeve dhe mendimit”, argumenton juristi.
Pikërisht këtu qëndron një nga çështjet thelbësore të debatit: kufiri mes ruajtjes së rendit publik dhe cenimit të lirive themelore. E drejta për të protestuar, për t'u organizuar dhe për të shprehur kundërshtimin, është e garantuar nga Kushtetuta dhe nuk mund të kufizohet thjesht sepse autoritetet e konsiderojnë një demonstratë të pakëndshme ose potencialisht problematike.
Përfaqësuesit e studentëve, argumentojnë se klima aktuale lidhet edhe me një qasje ndëshkuese ndaj të rinjve, të cilët përballen me pasiguri ekonomike dhe shqetësime për të ardhmen e tyre.
Angela Verdecchia, koordinatore kombëtare e Rrjetit të Studentëve të Shkollave të Mesme, thotë se, në vend që të dëgjohen kërkesat dhe pakënaqësitë sociale, po zgjidhet gjithnjë e më shpesh rruga e ndëshkimit dhe kriminalizimit të një brezi të tërë.
Sipas saj, ashpërsimi i dënimeve, kontrollet dhe presioni policor nuk mund t'u japin përgjigje problemeve që studentët po ngrenë përmes protestave dhe bllokimit të shkollave në mbarë Italinë.
“Ky pushtet, me masat e tij shtrënguese dhe mungesën e investimeve për të ardhmen tonë, ka ushqyer zemërimin e të rinjve që e dinë se mund të mos kenë mundësi të ndërtojnë një të ardhme këtu. Shumë prej tyre përjetojnë çdo ditë pasojat e pasigurisë ekonomike në familjet e tyre”, shprehet Verdecchia.
Ajo këmbëngul se problemet e brezit të ri s’mund të zgjidhen përmes kriminalizimit, por përmes dëgjimit, dialogut të vërtetë dhe investimeve konkrete. Kështu, debati në Itali nuk lidhet vetëm me mënyrën se si policia menaxhon protestat, por edhe me rrezikun që masat e sigurisë të shndërrohen në mjete frikësimi për ata që ushtrojnë të drejtat e tyre qytetare.
Kur të miturit ndalohen pa iu bërë të qartë arsyet ligjore dhe kur shkollat trajtohen si hapësira potencialisht të rrezikshme, lind nevoja për transparencë, hetim të çdo pretendimi për abuzim dhe respektim të garancive kushtetuese.
Ruajtja e rendit publik është detyrë e shtetit, por kjo nuk e përjashton detyrimin për të mbrojtur lirinë e shprehjes dhe të drejtën e protestës. Përndryshe, ekziston rreziku që masat e paraqitura si mjete për parandalimin e dhunës të perceptohen si ndëshkim ndaj vetë mospajtimit./Pamfleti nga “Huffington Post Italia”rreziqet e kriminalizimit të protestave Lini një Përgjigje Anuloje përgjigjen Rajoni dhe Bota Tragjedia në Spanjë, pse një tren me shpejtësi 300 km/orë ka nevojë për 5 kilometra për të ndaluar? 29 Tetor 2026, 16:0316:03Rajoni dhe Bota A i ndihmuan partitë arabe Katari dhe Turqia në zgjedhjet izraelite? 29 Tetor 2026, 15:4515:45Rajoni dhe Bota Netanyahu bën thirrje për një qeveri të krahut të djathtë, kundërshton të gjitha koalicionet me partitë arabe 29 Tetor 2026, 15:3415:34Rajoni dhe Bota Lagarde largohet, kush do e zëvendësojë? Nis beteja diplomatike për drejtimin e Bankës Qendrore Evropiane 29 Tetor 2026, 15:2115:21Rajoni dhe Bota BE forcon mbrojtjen dhe mbështetjen për Ukrainën, hap fondin prej 21.3 miliardë eurosh 29 Tetor 2026, 14:5514:55Rajoni dhe Bota Një planet xhuxh në Sistemin Diellor? Astronomët zbulojnë objektin misterioz përtej Plutonit 29 Tetor 2026, 14:5314:53Rajoni dhe Bota