Segmenti rrugor Qafë Qelë–Koman, me një gjatësi prej 31 kilometrash, është rikonstruktuar, duke përmirësuar aksesin drejt një prej zonave me potencial të lartë turistik në veri të vendit. Ministri i Infrastrukturës dhe Energjisë, Enea Karakaçi, së bashku me drejtorin e Autoritetit Rrugor Shqiptar, Ami Kozeli, ka inspektuar nga afër punimet e realizuara në këtë aks rrugor. Ky investim konsiderohet strategjik për zhvillimin e zonës, pasi lehtëson lëvizjen e banorëve dhe vizitorëve, si dhe pritet të ndikojë në rritjen e turizmit dhe zhvillimin ekonomik të zonave përreth.
