Europa rrezikon të mos arrijë objektivin për eliminimin e hepatitit viral si kërcënim për shëndetin publik deri në vitin 2030. Paralajmërimi vjen nga Qendra Europiane për Parandalimin dhe Kontrollin e Sëmundjeve (ECDC), e cila ngre shqetësimin për boshllëqet në vaksinimin e fëmijëve, diagnostikimin e hershëm dhe masat parandaluese. Pavarësisht përparimit të viteve të fundit në luftën kundër hepatitit B dhe C, miliona qytetarë europianë vijojnë të jetojnë me infeksione kronike, shpesh pa e ditur se janë të prekur. Këto infeksione mund të shkaktojnë pasoja të rënda afatgjata, përfshirë dëmtime të rënda të mëlçisë, cirrozë dhe kancer të mëlçisë. Sipas të dhënave të ECDC-së, rreth 5 milionë persona në Europë jetojnë me hepatit kronik B ose C, ndërsa rreth 60 mijë njerëz humbin jetën çdo vit nga sëmundje të mëlçisë të lidhura me këto infeksione. Hepatiti B dhe C transmetohen kryesisht përmes kontaktit me gjak të infektuar ose lëngje trupore dhe konsiderohen ndër shkaktarët kryesorë të sëmundjeve kronike të mëlçisë në Europë. Raporti vlerëson se janë bërë hapa të rëndësishëm në parandalim. Rastet e hepatitit akut B kanë rënë ndjeshëm që prej vitit 2006, falë përhapjes së vaksinimit dhe masave mbrojtëse. Gjithashtu, vaksinimi i fëmijëve dhe kontrollet gjatë shtatzënisë kanë ndihmuar në uljen e transmetimit të virusit nga nëna te fëmija. Megjithatë, ECDC thekson se Europa ende përballet me sfida të mëdha. Vetëm pak vende kanë arritur objektivin e Organizatës Botërore të Shëndetësisë për vaksinimin e plotë të 95% të fëmijëve kundër hepatitit B. Probleme mbeten edhe në fushën e parandalimit të transmetimit. Programet për ofrimin e pajisjeve sterile për personat që injektojnë drogë, si dhe shërbimet e testimit dhe trajtimit, nuk janë ende të mjaftueshme në shumë vende europiane. Sipas ekspertëve të ECDC-së, vaksinimi, diagnostikimi në kohë dhe trajtimet moderne mund ta kontrollojnë dhe, në perspektivë, ta eliminojnë hepatitin viral si problem madhor të shëndetit publik. Por për këtë, këto shërbime duhet të jenë të aksesueshme për të gjithë qytetarët.
