Sot pritet të zhvillohet protesta e 62-të e qytetarëve që kanë kërkuar dorëheqjen e kryeministrit Edi Rama. Sipas organizatorëve, pjesëmarrësit do të mblidhen fillimisht në sheshin “Skënderbej” dhe më pas do të marshojnë drejt godinës së Kryeministrisë, ku do të mbahen edhe fjalime.
Protestat, të cilat sipas organizatorëve nisën si reagim ndaj ngjarjes në Zvërnec, janë shoqëruar me kërkesa për dorëheqjen e kryeministrit, krijimin e një qeverie teknike dhe ndryshime kushtetuese. Në tubimet e mëparshme kanë marrë pjesë qytetarë të grupmoshave dhe profileve të ndryshme, të cilët kanë marshuar në rrugët kryesore të Tiranës dhe kanë ndaluar pranë institucioneve shtetërore për të shprehur qëndrimet e tyre.
Gjatë protestave janë mbajtur pankarta, flamuj kombëtarë dhe janë dëgjuar slogane kundër qeverisë dhe kryeministrit. Organizatorët kanë deklaruar se protesta synon të vijojë presionin publik për realizimin e kërkesave të tyre, ndërsa pritet që edhe tubimi i sotëm të zhvillohet në mënyrë të ngjashme me protestat e mëparshme.