Projektligji i propozuar nga Partia Socialiste për ndarjen e re territoriale të Shqipërisë, me 46 bashki, është kundërshtuar nga deputetët e Partisë Demokratike në Komisionin e Ligjeve. Gjatë diskutimeve, deputeti i PD-së Oerd Bylykbashi e cilësoi propozimin si një shkelje të Kushtetutës dhe të interesit të qytetarëve. Sipas tij, mënyra e hartimit të reformës dhe procedurat e ndjekura ngrenë pikëpyetje mbi legjitimitetin e procesit. “Reforma Territoriale, sipas propozimit të PS-së, është shkelje e Kushtetutës dhe e interesit të qytetarëve”, deklaroi Bylykbashi gjatë mbledhjes së Komisionit të Ligjeve. Në projektligjin e propozuar nga mazhoranca, parashikohet riorganizimi i territorit të vendit në 46 bashki, ndërsa në listën e propozuesve figurojnë: Arbjan Mazniku Romina Kuko Ondi Bejleri Aulona Bylykbashi Ardit Bido Klevis Jahaj Agron Malaj Adi Qose Ermal Pacaj Ermal Elezi Gjatë diskutimit në Komisionin e Ligjeve, Bylykbashi vuri në dukje gjithashtu përbërjen e listës së propozuesve, duke deklaruar se “nuk ka asnjë deputet të vjetër” mes tyre.
