Kompania amerikane e teknologjisë Nvidia ka nisur një hetim të pavarur pas raportimeve se drejtori i saj ekzekutiv, Jensen Huang, ka pasur një marrëdhënie me një biznesmene kineze, e dyshuar nga shërbimet amerikane të inteligjencës si agjente e Kinës. BBC shkruan se gjiganti i prodhimit të çipave deklaroi se bordi drejtues nuk ka aktualisht arsye të besojë se sekretet tregtare të kompanisë apo siguria kombëtare e SHBA-së janë cenuar. Në të njëjtën kohë, Nvidia konfirmoi se Huang mbetet i përkushtuar ndaj drejtimit të kompanisë. Ndërkohë, vetë Jensen Huang pranoi se kishte qenë ‘i pabesë’ ndaj bashkëshortes së tij, duke kërkuar falje për dhimbjen që, sipas tij, u ka shkaktuar asaj dhe fëmijëve të tyre. LEXO EDHE:Humbja e republikanëve në zgjedhjet e mesmandatit në SHBA, Trump: Amerika bëri një hap gjigant prapa në histori, por ne do rikthehemi më të fortë se kurrë Sipas një raportimi të gazetës “The New York Times”, zyrtarët amerikanë të inteligjencës dyshojnë se biznesmenia kineze Alice Huang, e cila kishte pasur një marrëdhënie të afërt me drejtuesin e Nvidia-s, punonte për Ministrinë e Sigurisë Shtetërore të Kinës. Në një deklaratë publike, Jensen Huang mori përgjegjësinë për veprimet e tij, duke pranuar se kishte dështuar në përmbushjen e përgjegjësive ndaj punonjësve, bordit drejtues dhe aksionarëve të kompanisë. “Isha i pabesë ndaj bashkëshortes sime. Veprimet e mia e lënduan atë dhe fëmijët tanë. Nuk ka asnjë justifikim për atë që bëra. Më vjen jashtëzakonisht keq”, deklaroi ai. Duke iu referuar shqetësimeve për sigurinë kombëtare, Huang bëri të ditur se mbështet plotësisht hetimin e nisur nga bordi drejtues dhe se do të bashkëpunojë me të. “E dua vendin tonë dhe kompaninë tonë. Jam i përkushtuar për të mbrojtur Nvidia-n dhe për të mbështetur sigurinë kombëtare të Amerikës. Jam krenar dhe mirënjohës që jam amerikan”, u shpreh ai. Edhe bordi drejtues i Nvidia-s publikoi një deklaratë të veçantë, ku konfirmoi nisjen e një hetimi të pavarur pas raportimeve se themeluesi dhe drejtori ekzekutiv i kompanisë mund të ketë qenë objekt i një operacioni të inteligjencës së huaj. Bordi theksoi se siguria kombëtare dhe ekonomike e Shteteve të Bashkuara mbetet përparësi, duke shtuar se, deri më tani, nuk ka të dhëna që të provojnë se janë komprometuar informacionet konfidenciale të kompanisë apo interesat e sigurisë kombëtare. Megjithatë, hetimi do të shqyrtojë të gjitha informacionet e disponueshme për të sqaruar rrethanat e çështjes. Alice Huang lidhet gjithashtu me kompaninë Megaspeed, me seli në Singapor, e cila operon në sektorin e qendrave të të dhënave. Muajin e kaluar, kompania i tha “The New York Times” se drejtuesit e saj aktualë i kishin marrë seriozisht akuzat dhe kishin angazhuar këshilltarë ligjorë të jashtëm për të kryer një hetim të brendshëm. Sipas burimeve të cituara nga gazeta amerikane, shërbimet e inteligjencës së SHBA-së kishin monitoruar Alice Huang dhe kishin arritur në përfundimin se ajo vepronte në emër të qeverisë kineze. Nga përgjimet e pretenduara, hetuesit kishin zbuluar komunikime mes saj dhe një shtetasi amerikan, identiteti i të cilit u përcaktua më pas si Jensen Huang, përmes një procedure të njohur në shërbimet e inteligjencës si “unmasking”. Megjithatë, ende nuk dihet se çfarë informacioni dyshohet se i është përcjellë Pekinit, sa i vlefshëm mund të ketë qenë ai apo kur biznesmenia kineze, e njohur gjithashtu me emrin Huang Le, ka nisur aktivitetin e pretenduar të mbledhjes së informacioneve. Alice Huang nuk iu përgjigj kërkesës së gazetës për një koment mbi këto pretendime. Kongresi amerikan kërkon shpjegime nga drejtuesi i Nvidia-s Çështja ka tërhequr edhe vëmendjen e Kongresit amerikan. Javën e kaluar, disa anëtarë të tij i kërkuan Jensen Huang të paraqitej përpara ligjvënësve për të dhënë shpjegime lidhur me raportimet për marrëdhënien e tij me biznesmenen kineze. Tre drejtues të komisioneve të Dhomës së Përfaqësuesve, të gjithë republikanë, i kërkuan atij të dëshmonte gjatë këtij muaji për protokollet e sigurisë së Nvidia-s kundër përpjekjeve të spiunazhit nga shtete rivale. Në letrën drejtuar drejtuesit të kompanisë, ata shprehën shqetësimin për mundësinë e depërtimit të Kinës në sektorët më të ndjeshëm të teknologjisë amerikane. “Raportimet e fundit ngrenë shqetësime të rëndësishme për sigurinë kombëtare, lidhur me mundësinë që Republika Popullore e Kinës të ketë akses në teknologjinë dhe informacionin e ndjeshëm amerikan”, thuhet në letër. Nvidia është një nga kompanitë më të rëndësishme në botë në fushën e inteligjencës artificiale, pasi prodhon çipat që përdoren nga disa prej zhvilluesve kryesorë të modeleve të inteligjencës artificiale, përfshirë OpenAI dhe Meta. Në muajin shkurt, kompania raportoi të ardhura rekord vjetore prej 215,9 miliardë dollarësh. Ndërkohë, çipat e avancuar të inteligjencës artificiale të Nvidia-s janë kthyer në një nga pikat kryesore të rivalitetit teknologjik mes Shteteve të Bashkuara dhe Kinës. Uashingtoni ka vendosur më herët kufizime për shitjen e disa prej produkteve më të avancuara të kompanisë në tregun kinez, për shkak të shqetësimeve se ato mund të forcojnë kapacitetet teknologjike dhe ushtarake të Pekinit. Një prej produkteve në qendër të këtyre kufizimeve është çipi H200, një nga gjysmëpërçuesit më të avancuar të Nvidia-s. Administrata Trump njoftoi në janar se do të lejonte shitjen e tij për klientët kinezë, por vetëm në përmbushje të disa kushteve të përcaktuara. Nga ana e saj, Kina ka mohuar më parë akuzat për një operacion spiunazhi ndaj drejtuesit të Nvidia-s, duke i cilësuar pretendimet si “spekulime të pabazuara”. R.Xh R.Xh Shqiptarja.com TAG: nvidia SHBA skandal spiunazhi skandal seksual Jensen Huang kongresi amerikan Sa e vlerësoni këtë artikull? ★ ★ ★ ★ ★ 0.0 / 5 (0 vlerësime) Faleminderit! LAJMET MË TË VLERËSUARA Komente Komento Sondazhi i ditës:
3 Nëntor, 11:50
Cilin mbështesni në përplasjen politike që u hap? Ramën 48.1% Veliajn 17.4% Asnjërin 34.5% Vota total: 2107 Votat totale janë unike Sondazhi i ditës: 3 Nëntor, 11:50 Cilin mbështesni në përplasjen politike që u hap?