Kryeministri i Polonisë, Donald Tusk, ka lëshuar një paralajmërim të fortë se javët e ardhshme do të shënojnë një moment kritik në luftën në Ukrainë, me rrezik real të shtrirjes së tensioneve drejt vendeve anëtare të NATO-s. Duke folur në parlamentin polak në Varshavë, Tusk u bazua te raportet e inteligjencës nga Polonia, Ukraina, SHBA-ja dhe aleanca e NATO-s.
Kryeministri polak theksoi se ekziston një shqetësim i madh se dronët ose predhat ruse mund të depërtojnë në territorin e krahut lindor të NATO-s, përfshirë Poloninë, duke shkaktuar dëme të mundshme. Sipas tij, strategjia e Moskës pritet të mbështetet te narrativa se këto goditje ishin thjesht aksistente, me qëllim që të shmanget çdo reagim zyrtar nga aleanca veriatlantike. Një sfidë e veçantë për mbrojtjen ajrore mbetet përdorimi në rritje i dronëve me motor reaktiv, të cilët fluturojnë më lart dhe më shpejt se modelet e mëparshme, duke u bërë më të vështirë për t'u zbuluar.
Analiza e inteligjencës tregon se Rusia po përqendron aktualisht sulmet e saj te pikat kufitare midis Ukrainës dhe fqinjëve të saj evropianë, me qëllim kryesor prishjen e linjave vitale të furnizimit të Ukrainës. Vetëm gjatë javës së kaluar janë regjistruar katër incidente të tilla në kufirin polako-ukrainas.
Këto deklarata vijnë pas një serie incidentesh reale në terren. Mëngjesin e kaluar, sulmet me dronë pranë pikës kufitare në Yahodyn aktivizuan sirenat e alarmit në territorin polak dhe detyruan ngritjen e menjëhershme të avionëve luftarakë. Komanda e Forcave Ajrore Polake konfirmoi se avionët dhe mbrojtja ajrore kanë qenë në gatishmëri të lartë edhe gjatë mbrëmjes për shkak të operacioneve ajrore ruse pranë kufirit. Sipas të gjitha burimeve të inteligjencës, fundi i vjeshtës dhe dimri pritet të sjellin fazën më vendimtare dhe kritike të konfliktit aktual.