Një arsenal armësh dhe pajisjesh ushtarake është zbuluar në zonën e Kalludrës në Zubin Potok, në veri të Kosovës. Armatimi dhe materialet e sekuestruara janë ekspozuar në Qendrën e Njësive Speciale “Enver Zymeri” në Mitrovicë.
Ministri në detyrë i Punëve të Brendshme, Xhelal Sveçla, tha se sekuestrimi është rezultat i një hetimi të gjatë dhe intensiv të institucioneve të Kosovës. Ai e cilësoi zonën veçanërisht të rëndësishme, pasi aty janë zbuluar së fundmi edhe tri varreza masive.
Sipas autoriteteve kosovare, në këto tri lokacione janë gjetur mbetje mortore të 23 personave. Në lokacionin e parë janë identifikuar mbetje të 13 personave, në të dytin të katër personave dhe në të tretin të gjashtë personave.
Sveçla tha se gjetja e arsenalit dhe varrezave masive është bërë e mundur pas shtrirjes së institucioneve shtetërore në veri dhe bashkëpunimit ndërmjet institucioneve të sigurisë.
Ai e lidhi këtë zonë me krimet e kryera gjatë luftës në Kosovë, duke theksuar se veriu ishte përdorur edhe për fshehjen e trupave të viktimave. Sipas tij, Serbia ka investuar ndër vite që kjo pjesë e Kosovës të mbetej e destabilizuar dhe jashtë kontrollit të institucioneve të sigurisë së Kosovës.
Ndërkohë, Policia e Kosovës ka vijuar operacionet dhe hetimet për dokumentimin e plotë të gjetjeve. Autoritetet kanë deklaruar se synojnë identifikimin e viktimave dhe zbardhjen e përgjegjësive për krimet e luftës dhe fshehjen e trupave. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm