Garda Revolucionare e Iranit i ka dërguar një mesazh të ri paralajmërues Shteteve të Bashkuara, në një kohë kur Uashingtoni po përforcon praninë e tij ushtarake në Lindjen e Mesme. Zëdhënësi i Gardës Revolucionare, Hossein Mohebbi, publikoi një imazh ku shfaqet një grup raketash të pozicionuara në bregdet dhe të drejtuara drejt një aeroplanmbajtëseje amerikane. Fotografia shoqërohej me një mesazh të shkurtër, por të drejtpërdrejtë: “Po ju presim”. Postimi vjen në një moment tensionesh të larta mes Uashingtonit dhe Teheranit, ndërsa Shtetet e Bashkuara po shtojnë forcat detare në rajon. Sipas raportimit, SHBA-të kanë nisur lëvizjet për vendosjen e një grupi të tretë sulmues aeroplanmbajtësesh në Lindjen e Mesme, së bashku me një njësi shtesë ekspedite të Marinës amerikane. Anija luftarake USS Theodore Roosevelt u nis drejt rajonit në fund të shtatorit, ku ndodhen tashmë edhe USS George H.W. Bush dhe USS George Washington. Forca e re amerikane pritet të mbërrijë në nëntor. Presidenti amerikan Donald Trump deklaroi javën e kaluar se nuk do të ndërmerren veprime të reja ushtarake amerikane kundër Iranit përpara zgjedhjeve të mesit të mandatit, të planifikuara për 3 nëntor.
Ndërkohë, Teherani vijon të dërgojë paralajmërime ndaj forcave amerikane të dislokuara në Lindjen e Mesme. Capture © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb