Një sulm i përgjakshëm ndaj një shqiptari 58-vjeçar ndodhi gjatë natës në Agia Galini në Rethymno të Kretës, ndërsa policia është në kërkim të një 17-vjeçari, i cili dyshohet se është i përfshirë në këtë rast. I plagosuri po trajtohet në Spitalin e Përgjithshëm Universitar të Heraklionit (PAGNI), pasi ka marrë dy plagë me thikë në bark, raporton korrespondenti i Top Channel Artur Bibe.
Sipas burimeve, 58-vjeçari me origjinë shqiptare, i cili banon në zonë me familjen e tij, u sulmua brenda shtëpisë së tij. Rrethanat në të cilat ndodhi incidenti mbeten nën hetim, ndërsa autoritetet po shqyrtojnë provat që mund të çojnë në identifikimin e të riut.
Pas lëndimit, i plagosuri u transferua fillimisht në Qendrën Shëndetësore Moira, ku iu dha ndihma e parë dhe u bënë përpjekje për të stabilizuar gjendjen e tij. Më pas, për shkak të plagëve të rënda, u pa e nevojshme transportimi i tij me ambulancë të EKAB për në PAGNI, i shoqëruar nga një mjek, me qëllim që të merrte kujdes të specializuar spitalor.
Hetimet e policisë janë në kulmin e tyre, ndërsa shërbimet kompetente janë në kërkim të 17-vjeçarit dhe po hetojnë rrethanat e sakta të sulmit të përgjakshëm.
Policia greke ka ndërmarrë hetime paraprake, të cilat po përpiqen të sqarojnë se çfarë i parapriu sulmit dhe cilat ishin motivet pas incidentit. Top Channel