Evropa duhet të përfshihet në bisedimet për një zgjidhje paqësore në Ukrainë, sepse pozicioni i saj mund të jetë vendimtar, tha të martën këshilltari i Kremlinit, Yuri Ushakov. Shtetet e Bashkuara nuk kanë arritur të ushtrojnë presion mbi Kievin për të nënshkruar një marrëveshje paqeje, tha Ushakov në një intervistë.
“Më parë, dukej se pas Anchorage, administrata amerikane mund të diktonte diçka dhe ta detyronte Kievin të bindej. Por deri më tani, në realitet kjo nuk ka funksionuar”, tha Ushakov, duke iu referuar takimit të vitit 2025 në Anchorage midis Presidentit të SHBA-së, Donald Trump, dhe Presidentit rus, Vladimir Putin.
“Kjo ndodh sepse nuk mjafton të flasim vetëm me Kievin, duhet të flasim me të gjithë Evropën, e cila e mbështet plotësisht Kievin”, shtoi ai.
Siç vëren Reuters, pasi fillimisht ia lanë Trumpit të përpiqej të ndërmjetësonte një marrëveshje për t’i dhënë fund luftës së Rusisë në Ukrainë, BE-ja është zhvendosur me kujdes drejt Rusisë. Udhëheqësit e Britanisë, Gjermanisë dhe Francës kanë thënë se do të mbështesin një propozim për bisedime midis Presidentit ukrainas, Volodymyr Zelensky dhe Putinit për të siguruar një armëpushim dhe se Evropa do të luante një rol.
Ndërkohë, Rusia ka thënë se do të jetë e hapur për dialog, por pa ultimatume.
Sot, Ushakov tha se Rusia është gati të rifillojë bisedimet trepalëshe të paqes me Ukrainën dhe Shtetet e Bashkuara pas Ditës Kombëtare të Unitetit të Rusisë më 4 nëntor, duke i bërë jehonë raporteve nga Kremlini këtë javë në lidhje me gatishmërinë e Putinit për të rifilluar bisedimet e ndërmjetësuara nga SHBA-ja me Ukrainën që në muajin e ardhshëm.
Zelensky tha të premten se përfaqësuesit në bisedimet e paqes nga Ukraina, Rusia dhe Shtetet e Bashkuara kishin rënë dakord të takoheshin në një nivel teknik në gjysmën e parë të nëntorit në Abu Dhabi, duke shtuar se shpresonte që një takim i udhëheqësve të tyre do të pasonte.
Ushakov përmendi gjithashtu mundësinë e një takimi midis Putinit, Presidentit Kinez Xi Jinping dhe Presidentit të SHBA-së Donald Trump, duke thënë se përgatitjet kishin filluar tashmë. Takimi i propozuar pritet të zhvillohet në margjinat e samitit të Bashkëpunimit Ekonomik Azi-Paqësor (APEC), i cili do të mbahet në Kinë më 18-19 nëntor.
Një takim i veçantë midis Putinit dhe Trump në Shenzhen nuk është rënë dakord ende, tha Ushakov. Top Channel