Vetëm pak kohë pas vdekjes së këngëtares së njohur amerikane Dolly Parton, pasuria dhe trashëgimia e saj janë përfshirë në një përplasje ligjore.
Bryan Seaver, nipi i Parton dhe ish-përgjegjësi i sigurisë së saj për më shumë se dy dekada, është përballur me një urdhër të përkohshëm kufizimi, pas akuzave për kërcënime ndaj kompanisë që administron pasurinë dhe interesat e biznesit të këngëtares.
Sipas dokumenteve të paraqitura në gjykatë, kompania “She’s Alive”, e krijuar për të menaxhuar dhe mbrojtur trashëgiminë profesionale të Parton, pretendon se situata u përshkallëzua pasi Seaver u largua nga detyra e tij. Administratorët e akuzojnë atë për mesazhe kërcënuese dhe për presion lidhur me kërkesa financiare.
Në disa prej mesazheve të paraqitura si prova, Seaver dyshohet se ka përmendur eksperiencën e tij me kontraktorë ushtarakë dhe ka folur për aftësinë e tij për dhunë. Dokumentet pretendojnë gjithashtu se ai kërcënoi se do të dëmtonte partneritetet dhe imazhin e markës së Dolly Parton.
Për shkak të situatës, sipas kompanisë, disa punonjës u larguan ose shmangën paraqitjen në zyrë, ndërsa u angazhua edhe siguri private për stafin. Avokati që merrej me çështjet e trashëgimisë raportohet gjithashtu se dha dorëheqjen.
Një gjykatë në Tennessee i dha kompanisë “She’s Alive” një urdhër të përkohshëm kufizimi ndaj Seaver dhe kompanisë së tij të sigurisë. Urdhri parashikon, ndër të tjera, që ai të mos kontaktojë apo t’u afrohet punonjësve, avokatëve dhe partnerëve të biznesit të kompanisë. Një seancë e mëtejshme është caktuar për 7 tetor. Nga ana tjetër, Seaver i ka mohuar akuzat. Ai ka deklaruar se mesazhet e tij janë nxjerrë jashtë kontekstit dhe se ato janë shkëmbyer në një moment të madh frustrimi pas largimit të tij nga puna. Ai ka mohuar se kishte për qëllim të kërcënonte familjen e Parton apo personat që administrojnë trashëgiminë e saj.
Dolly Parton ndërroi jetë më 25 gusht 2026, në moshën 80-vjeçare. Pasuria e saj është vlerësuar rreth 450 milionë dollarë, sipas vlerësimit të Forbes të raportuar nga Reuters. Megjithatë, se kush do të përfitojë konkretisht nga pasuria e këngëtares nuk është bërë plotësisht publike. Raportimet amerikane theksojnë se një pjesë e konsiderueshme e pasurisë mund të jetë e strukturuar përmes trusteve dhe entiteteve të tjera, duke e mbajtur jashtë dokumenteve publike identitetin e përfituesve.