Kryebashkiaku i Himarës, Vangjel Tavo, ka publikuar pamje nga situata në zonat e prekura nga zjarri i madh i një dite më parë, ku duken dëmet e shkaktuara nga flakët. Tavo bën me dije se, pas një nate të vështirë, puna në terren vijon për shuarjen përfundimtare të vatrave dhe rikthimin gradual të normalitetit. Me ndihmën e ndërhyrjes nga ajri, u bë e mundur eliminimi i vatrave ku ndërhyrja nga toka ishte e pamundur. Forcat zjarrfikëse vijuan punën edhe në orët e para të mëngjesit, duke shuar trungjet e ullinjve që vazhdonin të digjeshin. Ndërkaq, punonjësit e Bashkisë Himarë janë angazhuar për largimin e mbetjeve të shkaktuara nga zjarri dhe rikthimin gradual të normalitetit në zonat e prekura. Ndërsa vijon evidentimi i dëmeve të shkaktuara, Tavo thekson se pamjet e sotme duhet të shërbejnë si një moment reflektimi për pasojat e rënda që mund të shkaktojë zjarri, qoftë ai aksidental apo i qëllimshëm. Nis evidentimi i dëmeve nga zjarri në Himarë, Tavo: Po identifikohen familjet e prekura
