Berisha dhe LaCivita Investigimi i revistës amerikane Mother Jones ngre pikëpyetje mbi mënyrën se si Sali Berisha siguroi akses te zyrtarët e lartë republikanë në Dallas, ndërkohë që Departamenti Amerikan i Shtetit nuk ka konfirmuar heqjen e shpalljes së tij non grata. Në qendër të shkrimit janë kontratat milionëshe me njerëzit e Donald Trump, 750 mijë dollarët e paguar për lobim dhe fondacioni që financoi këtë operacion... Revista amerikane Mother Jones ka publikuar një investigim të gjatë mbi vizitën e Sali Berishës në Dallas, ku kreu i Partisë Demokratike mori pjesë në aktivitetin e republikanëve amerikanë dhe publikoi fotografi me disa nga zyrtarët më të rëndësishëm të administratës së Donald Trump.
Shkrimi, me titullin “Departamenti i Shtetit e quajti të korruptuar, zyrtarët e Trump e pritën në Dallas”, vendos përballë dy realitete që Berisha ka tentuar t'i paraqesë si një histori të vetme: shpalljen e tij non grata nga Shtetet e Bashkuara në vitin 2021 dhe aksesin që siguroi pesë vite më vonë në aktivitetin politik të republikanëve.
Por investigimi amerikan nuk e trajton udhëtimin si një rehabilitim politik të Berishës. Përkundrazi, ai kërkon të zbulojë se kush ia mundësoi hyrjen në aktivitet, çfarë roli luajtën lidhjet e tij me lobistët amerikanë dhe përse Departamenti i Shtetit vazhdon të mos konfirmojë heqjen e përcaktimit të vitit 2021.
Në këtë histori shfaqen emrat e Chris LaCivita, Paul Manafort, Tony Fabrizio, njerëzve të afërt me Sekretarin amerikan të Shtetit Marco Rubio dhe shefen e kabinetit të Shtëpisë së Bardhë, Susie Wiles. Në qendër janë edhe pagesat që Partia Demokratike ka kryer për konsulencë politike dhe lobim në Shtetet e Bashkuara.
Gjatë aktivitetit republikan të shtatorit në Dallas, Donald Trump dhe drejtuesit e partisë paralajmëruan se një fitore e demokratëve në zgjedhjet e nëntorit do ta çonte Amerikën drejt komunizmit. Ndërkohë, në prapaskenat e aktivitetit, zyrtarët republikanë takonin Sali Berishën, ish-anëtarin e Partisë së Punës së Shqipërisë gjatë diktaturës së Enver Hoxhës. Është pikërisht ky kontrast me të cilin Mother Jones hap investigimin.
Berisha publikoi fotografi me Todd Blanche dhe Stanley Woodward, drejtues të lartë të Departamentit Amerikan të Drejtësisë, me ish-zyrtarin Ed Martin, administratorin e Medicare dhe Medicaid, Mehmet Oz, kryetarin e Komitetit Kombëtar Republikan, Joe Gruters, senatorin James Lankford, kandidatin republikan Mike Rogers dhe komentatorin konservator Ben Shapiro. Me Ken Paxton, Prokurorin e Përgjithshëm të Texasit dhe kandidatin republikan për Senatin e Shteteve të Bashkuara.
— Sali Berisha (@saliberisha_) September 10, 2026 Në disa prej këtyre takimeve ishte edhe Fatmir Mediu, ish-ministër i Mbrojtjes, të cilin revista e identifikon si politikan me lidhje të konsoliduara me republikanët amerikanë, përfshirë prokurorin e përgjithshëm të Teksasit, Ken Paxton.
Berisha i paraqiti fotografitë si dëshmi të takimeve politike të rëndësishme. Për kontaktin me Blanche dhe Woodward deklaroi se kishte zhvilluar një takim me rëndësi për marrëdhëniet Shqipëri-SHBA. Por Mother Jones evidenton se nuk ka një konfirmim nga institucionet amerikane për përmbajtjen dhe karakterin zyrtar të këtyre takimeve.
Departamenti i Drejtësisë nuk iu përgjigj pyetjeve të revistës. As Komiteti Kombëtar Republikan dhe as Partia Demokratike e Shqipërisë nuk dhanë shpjegime për mënyrën se si u organizua pjesëmarrja e Berishës.
Aktiviteti në Dallas nuk ishte një konferencë e zakonshme politike me hyrje të lirë. Ai funksiononte edhe si një mekanizëm për mbledhjen e fondeve të republikanëve, me bileta që kushtonin mijëra dollarë. Sipas një ftese të republikanëve të Kalifornisë, një vend në ballkon kushtonte 5 mijë dollarë, ndërsa paketa më e lartë, e quajtur Golden VIP Access, arrinte në 250 mijë dollarë.
Një pjesëmarrës i tha revistës se republikanët e Floridës kishin kërkuar fillimisht një kontribut minimal prej 20 mijë dollarësh, përpara se çmimi të ulej në rreth 2 mijë dollarë për shkak të kërkesës së dobët. Në Konventën Republikane në Dallas, së bashku me z. Fatmir Mediu, pata nderin të takoja Prokurorin e Përgjithshëm të SHBA, Todd Blanche, dhe Zv. Prokurorin e Përgjithshëm, Stanley Woodward Jr. Një takim i rëndësishëm për marrëdhëniet Shqipëri–SHBA.
— Sali Berisha (@saliberisha_) September 11, 2026 Revista nuk pretendon se Berisha ka paguar për takimet apo se ka financuar republikanët. Por evidenton se fotografitë e tij dëshmojnë një nivel aksesi që ngre pyetjen se kush e siguroi atë. Gary Kokalari, president i organizatës amerikane Albanians for a Democratic Albania, e formulon drejtpërdrejt këtë pikëpyetje në intervistën për Mother Jones: Si arriti Berisha të hynte atje?
Sipas dokumenteve të përmendura në investigim, Berisha udhëtoi me ftesë të International Democracy Union, një aleancë ndërkombëtare partish të djathta. Megjithatë, revista nuk arriti të përcaktonte nëse delegacioni përfshinte edhe përfaqësues të tjerë përveç politikanëve shqiptarë.
Kontratat me njerëzit e Trump dhe 750 mijë dollarët për lobim
Pikërisht këtu investigimi rikthen në vëmendje marrëdhënien financiare të Partisë Demokratike me njerëzit që organizuan fushatat elektorale të Donald Trump.
Përpara zgjedhjeve parlamentare të 11 majit 2025, PD angazhoi Chris LaCivita, një nga drejtuesit e fushatës presidenciale të Trump në vitin 2024. Në të njëjtën periudhë, partia kontraktoi edhe Tony Fabrizio, sondazhist i Trump, si dhe Paul Manafort, ish-drejtues i fushatës së tij presidenciale të vitit 2016, i cili më vonë u dënua për shkelje të ligjeve amerikane.
Në daljet e tij publike në Tiranë, LaCivita e paraqiti Berishën si një politikan që mund të bashkëpunonte me administratën Trump. Sipas dokumenteve financiare që citon Mother Jones, Partia Demokratike raportoi pagesa prej më shumë se 1.6 milionë dollarësh për kompaninë Advancing Strategies të LaCivita.
Por kur revista amerikane e pyeti për pjesëmarrjen e Berishës në Dallas, LaCivita mohoi çdo rol në organizimin e saj. Ai deklaroi se nuk kishte pasur asnjë përfshirje në praninë e Berishës në aktivitet dhe se nuk bashkëpunonte më me Partinë Demokratike të Shqipërisë. LaCivita refuzoi gjithashtu të tregonte nëse ishte takuar personalisht me Berishën gjatë aktivitetit.
Ky është një detaj i rëndësishëm, pasi LaCivita kishte ndihmuar në organizimin e aktivitetit republikan në Dallas. Pra, njeriu që PD pagoi me më shumë se 1.6 milionë dollarë dhe që kishte lidhje me organizimin e aktivitetit, deklaron se nuk ka pasur asnjë rol në pjesëmarrjen e ish-klientit të tij shqiptar.
Revista nuk sjell prova që e kundërshtojnë këtë deklarim, por e lë të hapur pyetjen se kush ndërhyri për të mundësuar aksesin e Berishës.
Ndërkohë, një tjetër kontratë ka pasur një objektiv shumë më konkret: heqjen e përcaktimit të Berishës nga Departamenti Amerikan i Shtetit.
Partia Demokratike ka angazhuar kompaninë amerikane Continental Strategy LLP për të lobuar në favor të tij. Sipas Mother Jones, kjo kompani përfshin në rrjetin e saj një ish-bashkëpunëtor të lartë të Marco Rubios dhe vajzën e Susie Wiles, shefes së kabinetit të Shtëpisë së Bardhë.
Dokumentet që Continental ka depozituar pranë Departamentit Amerikan të Drejtësisë, sipas ligjit për regjistrimin e agjentëve të huaj, FARA, tregojnë kontakte të shumta me Departamentin e Shtetit. Mes zyrtarëve të kontaktuar figuron edhe Dan Holler, bashkëpunëtor prej vitesh i Marco Rubios dhe këshilltar në Departamentin e Shtetit.
Continental ka deklaruar se ka marrë 750 mijë dollarë për këtë angazhim. Por revista ndalet te mekanizmi i financimit.
Pagesat, sipas investigimit, kaluan përmes një organizate me emrin Make Albania Great Again Foundation, të lidhur me një kontraktor në New Jersey. Organizata u krijua në vitin 2025, në periudhën kur nisi edhe kontrata e lobimit, me një adresë banimi në periferi.
Mother Jones e përshkruan këtë mekanizëm financimi si të paqartë dhe evidenton se nuk ka marrë përgjigje për origjinën e parave.
Një zëdhënës i Continental nuk iu përgjigj pyetjeve të revistës mbi burimin e fondeve, por deklaroi se kompania kishte dorëzuar dokumentacionin e kërkuar dhe kishte respektuar detyrimet e ligjit FARA. Kompania mohoi gjithashtu se kishte luajtur rol në organizimin e vizitës së Berishës në Dallas.
Kështu, dy prej aktorëve amerikanë me të cilët Berisha dhe PD kanë pasur marrëdhënie financiare, Chris LaCivita dhe Continental Strategy, mohojnë përfshirjen në udhëtimin që kreu i PD e paraqiti si sukses të rëndësishëm politik.
Megjithatë, dokumentet e lobimit tregojnë se Partia Demokratike ka paguar shuma të konsiderueshme për të ndikuar në çështjen e statusit të Berishës në Shtetet e Bashkuara.
Në këtë pikë, Mother Jones e lidh historinë e Berishës me një tjetër politikan ballkanik, Milorad Dodik, për të treguar mënyrën se si figura politike të rajonit kanë kërkuar mbështetje përmes njerëzve të afërt me Trump.
Revista i referohet raportimit të New York Times mbi udhëtimin e Chris LaCivita dhe James Blair në Republikën Srpska, entitetin serb të Bosnjë-Hercegovinës, për të këshilluar partinë e Dodikut përpara zgjedhjeve.
Dodik kishte qenë objekt i sanksioneve amerikane për veprimet që cenonin marrëveshjen e Dejtonit dhe strukturën shtetërore të Bosnjë-Hercegovinës. Qeveria e tij kishte angazhuar lobistë me lidhje me administratën Trump dhe, sipas revistës, këto përpjekje ndihmuan në heqjen e sanksioneve amerikane ndaj tij.
LaCivita dhe Blair u përballën me kritika nga republikanët për shkak se angazhimi në Ballkan përkonte me fushatën amerikane për zgjedhjet e mesmandatit. Donald Trump paralajmëroi se mund t'i largonte nëse aktivitetet e tyre private krijonin konflikt me punën politike në Shtetet e Bashkuara.
Por ndërsa në rastin e Dodikut revista raporton heqjen e sanksioneve, për Berishën situata mbetet ndryshe.
Udhëtimi në SHBA nuk është konfirmim për heqjen e non grata
Në maj të vitit 2021, sekretari amerikan i Shtetit Antony Blinken shpalli publikisht Sali Berishën të papërshtatshëm për hyrje në Shtetet e Bashkuara për përfshirje në korrupsion të rëndësishëm.
Departamenti i Shtetit përmendi shpërdorimin e fondeve publike, ndërhyrjen në procese publike dhe përdorimin e pushtetit për përfitime personale, të familjarëve dhe aleatëve politikë.
Në verën e vitit 2026, administrata Trump i dha Berishës një përjashtim nga kufizimi i hyrjes, që i mundësoi udhëtimin në SHBA. Berisha e interpretoi këtë vendim si zgjidhje të çështjes së tij me autoritetet amerikane.
Por Mother Jones shkruan se Departamenti i Shtetit nuk e ka konfirmuar heqjen e përcaktimit të vitit 2021. Madje, deklarata origjinale për korrupsionin e rëndësishëm vazhdon të qëndrojë në faqen zyrtare të Departamentit të Shtetit.
Revista i kërkoi institucionit amerikan të sqaronte statusin e Berishës, por nuk mori përgjigje.
Kjo do të thotë se hyrja e Berishës në territorin amerikan është një fakt, ndërsa heqja përfundimtare e përcaktimit të tij non grata mbetet e pakonfirmuar nga institucioni që e shpalli.
Dallimi nuk është thjesht terminologjik. Një autorizim për të udhëtuar nuk përbën automatikisht tërheqje të konstatimeve të Departamentit të Shtetit për korrupsion.
Investigimi ndalet edhe te problemet gjyqësore dhe diplomatike që Berisha vazhdon të ketë jashtë fotografive të Dallasit.
Ai përballet në Shqipëri me akuza për korrupsion në çështjen e privatizimit të ish-kompleksit sportiv Partizani, ku prokuroria pretendon se vendimmarrja e tij favorizoi dhëndrin Jamarbër Malltezi. Berisha i mohon akuzat.
Po ashtu, ai vazhdon të përballet me ndalimin e hyrjes në Mbretërinë e Bashkuar, vendim që autoritetet britanike e kanë mbajtur në fuqi.
Mother Jones përmend edhe qëndrimin e ambasadorit të ri amerikan në Shqipëri, Eric Wendt, i cili, sipas raportimeve të mediave shqiptare që citon revista, nuk zhvilloi takim me Berishën gjatë kontakteve të tij politike në Tiranë.
Këto zhvillime vendosin një kufi të qartë mes marrëdhënieve personale me figura të Partisë Republikane dhe qëndrimeve institucionale të Departamentit Amerikan të Shtetit apo të përfaqësisë diplomatike amerikane.
Në fund, shkrimi i Mother Jones nuk e vë në dyshim faktin që Berisha shkoi në Dallas dhe pati akses te një numër zyrtarësh të lartë amerikanë. Ai ngre një çështje tjetër: çfarë mekanizmi politik dhe financiar e mundësoi këtë akses?
Chris LaCivita, i paguar nga PD me mbi 1.6 milionë dollarë për angazhimin elektoral, mohon se ka ndërmjetësuar vizitën. Continental Strategy, e cila deklaron 750 mijë dollarë pagesa për lobimin mbi statusin e Berishës, mohon gjithashtu përfshirjen.
Komiteti Kombëtar Republikan nuk i është përgjigjur revistës për organizimin e pjesëmarrjes së tij. Departamenti i Drejtësisë nuk ka dhënë shpjegime për karakterin e takimeve me zyrtarët e vet. Ndërsa Departamenti i Shtetit nuk ka konfirmuar se e ka hequr përcaktimin për korrupsion të rëndësishëm.
Kjo është tabloja që del nga investigimi amerikan, përtej mënyrës se si Berisha e ka reklamuar udhëtimin në Shqipëri.
Në Dallas, ai siguroi fotografitë dhe kontaktet që kërkonte për t'i përdorur në politikën e brendshme. Por Mother Jones dokumenton se pas këtij udhëtimi qëndron një histori më e gjatë kontratash, pagesash dhe lobimi, ndërsa pyetja se kush ia siguroi aksesin te drejtuesit republikanë mbetet pa përgjigje.
Dhe për sa kohë Departamenti i Shtetit nuk publikon një vendim tjetër, dokumenti amerikan i 19 majit 2021 mbetet referenca zyrtare publike për arsyet e shpalljes së Sali Berishës non grata. /Përshtati Pamfleti nga Mother Jones/ Lini një Përgjigje Anuloje përgjigjen Politike Shehaj nga Blloku i Sigurisë: Rreth 200 protestues të ndaluar, mes tyre 15 të mitur! 16 Tetor 2026, 16:5516:55Politike Pezullimi i dy efektivëve të policisë, reagon ministri Demo: Ligji do të jetë i barabartë për të gjithë 16 Tetor 2026, 16:3316:33Politike Nga flamingot te flakët në Tiranë, BBC zbërthen revoltën që ka përfshirë Shqipërinë 16 Tetor 2026, 15:4815:48Politike Revolta zgjerohet: Kush mund ta frenojë tani krizën politike? 16 Tetor 2026, 15:0615:06Politike Korrupsioni flet shqip, jo hebraisht: As Muri i Lotëve nuk të bën derman! 16 Tetor 2026, 14:1814:18Politike Kush ndërhyri për takimet e Berishës në Dallas? Media amerikane zbardh prapaskenat e vizitës në SHBA 16 Tetor 2026, 13:5213:52Politike