Një lajm i trishtë për sportin shqiptar. Lulëzim Jaho Shabanaj, një prej emrave të njohur të volejbollit shqiptar dhe ish-sportist ikonë i klubit të Partizanit, është ndarë papritur nga jeta mbrëmjen e 27 tetorit 2026, pas një arresti kardiak. 67-vjeçari ndërroi jetë në Tiranë Lulëzim Jaho Shabanaj lindi në kryeqytetin e Shqipërisë në prill të vitit 1959. Ai i kushtoi pjesën më të rëndësishme të jetës sportit, duke u bërë pjesë e një prej periudhave të rëndësishme të historisë së volejbollit të Partizanit dhe të përfaqësueses shqiptare. Fillimet sportive dhe formimi si volejbollist LEXO EDHE:Itali - Gjermani hyn në historinë e volejbollit, seti rekord mbyllet 66 - 64 pas një ore e 29 minutash lojë Lidhja e tij me sportin nisi që në fëmijëri, gjatë viteve 1968-1969, kur ishte nxënës në shkollën fillore dhe tetëvjeçare “10 Korriku”. Në atë periudhë u angazhua fillimisht me atletikën, në disiplinën e kërcimit së gjati. Shtatlartësia dhe aftësitë e tij të veçanta fizike, veçanërisht kërcyeshmëria, bënë që ai të përzgjidhej për t'u angazhuar në ekipet e moshave të volejbollit të Partizanit. Nën drejtimin e trajnerit Llagomi, Jaho hodhi hapat e parë drejt formimit si një prej lojtarëve premtues të volejbollit të kohës. Në moshën vetëm 16-vjeçare, në vitin 1975, u thirr nga trajneri i njohur Andon Kona në ekipin e parë të Partizanit ku bëri edhe debutimin me skuadrën e të rriturve. 1976-1991: 15 vite me fanellën e Partizanit Karriera e tij me ekipin e parë të Partizanit zgjati 15 vite, nga viti 1976 deri në vitin 1991. Lulëzim Jaho Shabanaj u bë një prej lojtarëve të rëndësishëm të skuadrës, duke luajtur në pozicionin e sulmuesit kryesor, në krahun e katërt, siç njihet në terminologjinë e volejbollit. Ai ishte pjesë e një brezi të veçantë të Partizanit, pasues i emrave të mëdhenj si D. Fagu, B. Borova, Y. Tomorri dhe E. Duravaku. Në të njëjtën periudhë ndau fushën me bashkëlojtarë si I. Halili, A. Farka, L. Qerfozi dhe E. Pëllumbi, nën drejtimin e trajnerit të njohur Andon Kona. Gjatë kësaj periudhe, me fanellën e Partizanit, ai fitoi disa kampionate dhe Kupa të Shqipërisë, duke lënë gjurmë në historinë e klubit kryeqytetas. 1980-1990: Pjesë e Kombëtares shqiptare Falë aftësive të spikatura sportive, nga viti 1980 deri në vitin 1990, Lulëzim Jaho ishte pjesë e ekipit kombëtar shqiptar të volejbollit. Ai përfaqësoi Shqipërinë në aktivitete dhe ndeshje të ndryshme brenda dhe jashtë vendit, duke qenë pjesë e përfaqësueses gjatë një dekade të rëndësishme të karrierës së tij sportive. Kontributi i tij nuk u kufizua vetëm te Partizani. Për shkak të cilësive të tij, Jaho u aktivizua edhe me ekipin e Dinamos në ndeshjet ndërkombëtare të Kupave të Europës, në të cilat skuadra kryeqytetase përfaqësonte volejbollin shqiptar. Ndër përballjet e përmendura të asaj periudhe është edhe takimi i vitit 1983 mes Dinamos dhe AC Cannes. Formimi akademik dhe karriera profesionale Paralelisht me karrierën sportive, Lulëzim Jaho Shabanaj ndoqi dhe përfi studimet e larta në Akademinë Ushtarake dhe në Universitetin e Sporteve në Tiranë. Pas përfundimit të studimeve në vitin 1983, ai nisi karrierën profesionale në Ministrinë e Mbrojtjes, ku shërbeu si oficer në reparte të ndryshme ushtarake në Tiranë deri në vitin 1992. Më pas u transferua në Ministrinë e Brendshme, ku mbajti detyra të ndryshme në Gardën e Republikës dhe në Policinë e Shtetit. Gjatë kësaj periudhe shërbeu edhe si Shef Rendi në Kavajë dhe në Komisariatin nr. 2 në Tiranë. Pas karrierës si sportist, vijoi kontributin në volejboll Pas përfundimit të karrierës si volejbollist, Jaho nuk u shkëput nga sporti që kishte qenë pjesë e rëndësishme e jetës së tij. Ai u angazhua si trajner i ekipeve të moshave të reja të Partizanit dhe gjithashtu si ndihmëstrajner i ekipit të të rriturve, nën drejtimin e trajnerit N. Panteqi. Në këtë mënyrë, përvoja dhe njohuritë e fituara gjatë viteve si sportist i nivelit të lartë i shërbyen edhe brezave të rinj të volejbollit. 27 tetor 2026 – Ndarja e papritur nga jeta Pas një jete të gjatë të lidhur me sportin dhe shërbimin publik, Lulëzim Jaho Shabanaj ishte prej vitit 2024 në pension. Por mbrëmjen e 27 tetorit 2026, një arrest kardiak i mori jetën papritur, duke ndërprerë jetën e një njeriu që kishte kaluar pjesën më të madhe të saj në shërbim të sportit dhe institucioneve shtetërore. Një emër që do të kujtohet në historinë e Partizanit Ndarja nga jeta e Lulëzim Jaho Shabanajt është një humbje për familjen, miqtë, bashkëlojtarët dhe komunitetin e volejbollit shqiptar. Ai do të kujtohet si një prej lojtarëve të brezit të Partizanit të viteve '70-'80, si pjesëtar i Kombëtares shqiptare dhe si një sportist që, edhe pas përfundimit të karrierës aktive, vijoi të kontribuonte në formimin e brezave të rinj. Një karrierë 15-vjeçare me fanellën e Partizanit, përfaqësimi i Shqipërisë dhe kontributi i tij si trajner mbeten pjesë e rrugëtimit të tij sportiv. Sporti shqiptar humbi një ish-sportist të njohur, ndërsa kujtimi i Lulëzim Jaho Shabanajt do të mbetet te ata që e njohën dhe ndanë me të pasionin për volejbollin. Ne.k. A.Hl Shqiptarja.com TAG: volejboll Lulëzim Shabanaj Sa e vlerësoni këtë artikull? ★ ★ ★ ★ ★ 0.0 / 5 (0 vlerësime) Faleminderit! LAJMET MË TË VLERËSUARA Komente Komento Sondazhi i ditës:
29 Tetor, 18:29
A besoni se TVSH-ja 6 përqind për ushqimet do të reflektohet si duhet në uljen e çmimeve? Po 49.2% Jo 42.7% Nuk e di 8.1% Vota total: 677 Votat totale janë unike Sondazhi i ditës: 29 Tetor, 18:29 A besoni se TVSH-ja 6 përqind për ushqimet do të reflektohet si duhet në uljen e çmimeve?