Trafiku detar përmes Ngushticës së Hormuzit ka shënuar një tjetër rënie të ndjeshme, në një kohë kur tensionet në Gjirin Persik mbeten të larta dhe bisedimet mes SHBA-së dhe Iranit për përfundimin e luftës kanë ngecur. Vetëm 12 anije kaluan përmes rrugës ujore strategjike gjatë së shtunës dhe të dielës, ndërsa fundjavën e kaluar ishin regjistruar 35 kalime. Të dhënat paraprake të gjurmimit të anijeve, të analizuara nga Reuters, tregojnë një rënie të ndjeshme të trafikut brenda vetëm një jave.
Ngadalësimi është vërejtur edhe gjatë ditëve të tjera të fundit, kur janë regjistruar vetëm tre ose katër kalime të anijeve tregtare në ditë, shumë më pak krahasuar me nivelet para shpërthimit të konfliktit.
Megjithatë, të dhënat e gjurmimit mund të mos pasqyrojnë të gjithë trafikun real në këtë korridor detar.
Një numër i konsiderueshëm anijesh tregtare po kalojnë nëpër zonë me AIS, Sistemin Automatik të Identifikimit, të çaktivizuar. Ky sistem transmeton të dhëna për pozicionin, kursin dhe identitetin e anijes përmes satelitit.
Çaktivizimi i AIS përdoret nga disa operatorë për të kufizuar mundësinë e zbulimit të anijeve në një zonë ku rreziku për lundrimin është rritur ndjeshëm. Për pasojë, anijet që udhëtojnë me transponderët e fikur nuk përfshihen plotësisht në të dhënat tradicionale të gjurmimit.
Rënia e trafikut vjen në një moment kur marrëdhëniet mes Uashingtonit dhe Teheranit mbeten të tensionuara dhe përpjekjet për rifillimin e negociatave për përfundimin e konfliktit nuk kanë shënuar përparim të dukshëm.
Ngushtica e Hormuzit është një prej korridoreve më të rëndësishme të energjisë në botë. Përpara luftës, rreth një e pesta e furnizimit global me naftë dhe gaz kalonte përmes saj, duke e bërë çdo ndërprerje të trafikut një çështje me ndikim të drejtpërdrejtë në tregjet ndërkombëtare të energjisë.
Kriza ka prekur edhe prodhuesit kryesorë të rajonit. QatarEnergy ka paralajmëruar se situata në Hormuz mund të vonojë planet e zgjerimit të investimeve, pasi transporti i pajisjeve është penguar, ndërsa prodhimi dhe eksportet e LNG-së mbeten të kufizuara.
Rënia e vazhdueshme e kalimeve tregon se transporti detar në Ngushticën e Hormuzit mbetet i ndjeshëm ndaj çdo zhvillimi ushtarak apo diplomatik në rajon. Top Channel