Zbulohet portreti i Shpëtim Aliut, i cili u arrestua mbrëmjen e së mërkurës në Rusi, ndërsa autoritetet shqiptare synojnë ekstradimin e tij drejt Shqipërisë.
Aliu ishte shpallur në kërkim nga SPAK në qershor të këtij viti, në kuadër të një hetimi për një rrjet ndërkombëtar të dyshuar të trafikut të kokainës. Sipas akuzave dhe të dhënave të përfshira në dosjen hetimore, ai dyshohet se ka pasur një rol të rëndësishëm në aktivitetin kriminal dhe në qarkullimin e të ardhurave të përfituara prej tij.
Sipas SPAK, në Shqipëri dyshohet se janë pastruar të paktën 30 milionë euro që burojnë nga aktivitetet kriminale.
Në menaxhimin dhe investimin e këtyre parave dyshohet se është përfshirë edhe vëllai i tij, Isa Aliu. Ky i fundit rezulton pronar i katër kompanive, të cilat, sipas hetimeve, dyshohet se janë përdorur për investime në pasuri të paluajtshme, vila, apartamente, troje dhe ndërtime, përfshirë edhe struktura hotelerie në zona turistike.
Në qershor 2026, Gjykata e Posaçme Kundër Korrupsionit dhe Krimit të Organizuar caktoi ndaj Shpëtim Aliut masën e sigurisë “Arrest në burg”. Ai dyshohet për veprat penale “Trafikimi i narkotikëve”, “Pastrimi i produkteve të veprës penale ose veprimtarisë kriminale”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Pjesë e hetimeve janë edhe komunikimet përmes platformës SKY, ku, sipas autoriteteve, Salvatore Aliu përdorte disa identitete, mes tyre “Dala”, “Qero”, “Qerosi”, “Viktor” dhe “Albo Pelon”.
Në një prej komunikimeve të gushtit 2020 me të vëllain, Isa Aliu dyshohet se e informon se kishte në dispozicion 6 milionë euro. Rreth dy javë më pas, Salvatore Aliu e njofton se priste të siguronte edhe 20 milionë euro të tjera.
Nga komunikimet e zbardhura nga hetuesit, dyshohet se Aliu i jepte vëllait udhëzime për mënyrën e fshehjes së parave deri në momentin kur ato do të investoheshin. Ndër alternativat e përmendura ishte edhe vendosja e shumave në fuçi 50-litërshe dhe groposja e tyre.