New York vendos kufizime të reja për përdorimin e inteligjencës artificiale në shkollat publike. Sipas rregullave të reja, nxënësit deri në klasën e tetë nuk do të mund të përdorin mjete të AI gjatë procesit mësimor, ndërsa në shkollat e mesme përdorimi i tyre do të lejohet vetëm në raste të përcaktuara dhe për qëllime edukative.
Masa vjen pas shqetësimeve të prindërve dhe mësuesve për ndikimin e përdorimit të pakontrolluar të AI te fëmijët, veçanërisht në zhvillimin e tyre njohës dhe mirëqenien psikologjike. Rregullat ndalojnë gjithashtu chatbot-et e krijuara për shoqëri virtuale apo mbështetje psikologjike, ndërsa mësuesit do të mund ta përdorin AI për përgatitjen e mësimeve dhe materialeve pedagogjike.
Departamenti i Arsimit rekomandon edhe kufizimin e kohës para ekranit gjatë mësimit, deri në 45 minuta për nxënësit e klasave të gjashta deri në të teta dhe 30 minuta për ciklin fillor. Vendimi pritet të ndiqet me interes në SHBA, pasi sistemi publik shkollor i New York-ut është më i madhi në vend, me më shumë se 900 mijë nxënës.