Fjetja e pamjaftueshme është lidhur gjithnjë e më shumë jo vetëm me mjegullimin mendor dhe plogështinë ditën tjetër, por edhe me boshllëqet në kujtesë dhe madje me rënien e aftësive njohëse më vonë gjatë jetës. Një mënyrë për të kufizuar efektet e dëmshme të shqetësimit gjatë natës është kombinimi ose alternimi i dremitjes dhe ushtrimeve fizike ditën pasuese, sipas studiuesve në Kanada, të cilët publikuan gjetjet e tyre në revistën Proceedings of the National Academy of Sciences (PNAS).Lexo edhe:Të varfrit plaken më shpejt: Një 60-vjeçar mund të ketë ritmin e ecjes së një 75-vjeçari të pasur “Personat që ose kryen 20 minuta ushtrime me intensitet të moderuar deri në të lartë, ose bënë një dremitje prej 90 minutash, patën rezultate rreth 22% më të mira në testet e kujtesës pas 30 orësh pa gjumë, krahasuar me ata që nuk bënë as njërën, as tjetrën”, tha Universiteti McGill në një përmbledhje të studimit, i cili u bazua në skanime të trurit. Në artikullin e botuar në PNAS, studiuesit paralajmëruan se privimi nga gjumi “dëmton aftësinë e trurit për të formuar kujtime të reja episodike, gjë që është thelbësore për funksionimin njohës të përditshëm, planifikimin e së ardhmes dhe marrjen e vendimeve”. “Humbja e gjumit ndikon pothuajse në çdo aspekt të mënyrës se si mendojmë dhe funksionojmë, por shumë njerëz thjesht nuk mund të ndalojnë atë që po bëjnë dhe të flenë më shumë”, tha Marc Roig nga Shkolla e Terapisë Fizike dhe Profesionale e McGill-it. Rezultatet e testit ka të ngjarë të jenë me interes për njerëzit e zënë, për të cilët një dremitje prej 90 minutash nuk është e mundur gjatë një dite pune. Por pushimi i drekës mund të jetë kohë e mjaftueshme për ata që mund ta përballojnë përgjumjen dhe të bëjnë 20 minuta ushtrime intensive me biçikletë ose të vrapojnë 5 kilometra. “Edhe një periudhë e shkurtër ushtrimesh mund të ndihmojë në ruajtjen e një prej aftësive tona më të rëndësishme njohëse”, argumentoi Roig, ndërsa kolegia e tij, Madhura Lotlikar, theksoi se ajo është “e arritshme, e lirë dhe e lehtë për t’u zbatuar”. Studiuesit theksuan se testet e tyre të trurit tregojnë se dremitja ndihmoi në rikuperimin e trurit të privuar nga gjumi, por paralajmëruan se ushtrimet fizike nuk mund ta zëvendësojnë gjumin, edhe nëse ato mund të “ndihmojnë njerëzit të funksionojnë më mirë kur marrja e mjaftueshme e pushimit nuk është e mundur”. Një stërvitje mund ta “ndihmojë trurin të përdorë në mënyrë më efikase burimet e tij të mbetura, pa i bërë pjesëmarrësit të ndihen më të lodhur”, thanë studiuesit./DPA News
