Zbulohen detaje të reja nga ngjarja tronditëse në lagjen Agios Panteleimonas të Athinës, ku një trup i pajetë u gjet i fshehur brenda një valixheje të braktisur në trotuar. Sipas ekzaminimit të parë mjekoligjor, viktima është një grua me trup të imët, e cila dyshohet se kishte ndërruar jetë rreth dy ditë më parë. Policia po kërkon personin që braktisi valixhen në rrugë. Ngjarja u zbulua pasditen e së dielës, më 8 nëntor, kur një 28-vjeçar me origjinë të huaj, duke kaluar në kryqëzimin e rrugëve Alkamënus dhe Harisis, në qendër të Athinës, ndjeu një erë të rëndë që vinte nga një valixhe e lënë në trotuar.
Ai njoftoi menjëherë policinë, e cila mbërriti në vendngjarje dhe hapi valixhen, duke zbuluar brenda saj trupin e pajetë. Sipas medias greke Zougla, ekzaminimi i parë i mjekut ligjor ka përcaktuar se bëhet fjalë për një grua me trup të imët, e cila kishte ende rrobat e veshura.
Vdekja e saj dyshohet se ka ndodhur rreth dy ditë përpara zbulimit, ndërsa valixhja mendohet të jetë lënë në trotuar gjatë 24 orëve të fundit.
Gjendja në të cilën ndodhej trupi ka krijuar fillimisht paqartësi edhe për përcaktimin e gjinisë së viktimës. Informacionet e para flisnin për një burrë, por ekzaminimi paraprak mjekoligjor ndryshoi pistën e hetimit.
Sipas raportimit grek, autoritetet po shqyrtojnë mundësinë që gruaja të jetë me origjinë afrikane, por kjo nuk është konfirmuar ende, pasi gjendja e trupit mund të ketë ndryshuar edhe karakteristikat e jashtme.
Hetimet e policisë greke janë përqendruar te identifikimi i viktimës dhe zbardhja e rrethanave të vdekjes. Oficerët po kontrollojnë kamerat e sigurisë në zonën përreth, me qëllim identifikimin e personit që mund të ketë transportuar dhe braktisur valixhen në trotuar.
Deri më tani nuk është bërë i ditur identiteti i gruas dhe as shkaku i vdekjes. Top Channel