Një mjek po kundërshton teorinë e "menopauzës së meshkujve", e cila po përhapet në rrjetet sociale. Në TikTok po publikohen video nga influencues të shëndetit, të cilët pretendojnë se burrat përjetojnë "andropauzën", termi që përdoret për të përshkruar menopauzën e meshkujve.Lexo edhe:Frikë nga gjilpërat? Studimi: Muzika ju ‘shpëton’ nga dhimbja Sipas tyre, andropauza prek "të gjithë burrat", mund të nisë që nga mesi i të tridhjetave dhe shkakton simptoma të ngjashme me ato të menopauzës te gratë. Por doktor James Chao thotë se menopauza e meshkujve nuk ekziston. "Termi “menopauzë e meshkujve” është çorientues, sepse mund t’i bëjë njerëzit t’i interpretojnë simptomat e ndryshme të moshës së mesme si shenjë të një problemi hormonal", shpjegoi ai. "Fjala “menopauzë” nënkupton një proces biologjik të parashikueshëm, të cilin burrat nuk e përjetojnë. Nuk ka një moment të përcaktuar kur çdo burrë kalon nga aftësia për të riprodhuar në pamundësinë për ta bërë këtë", shtoi doktor Chao, i cili ofron terapi hormonale në klinikën e tij, Veda Nu Wellness, në San Diego. Nga ana tjetër, ai e përshkruan menopauzën te gratë si "një rënie të menjëhershme". "Niveli i estrogjenit bie me 90% ose më shumë brenda pak vitesh dhe shënon fundin e përhershëm të pjellorisë", shpjegon drejtori kryesor mjekësor. "Nga ana tjetër, niveli i testosteronit bie me rreth 1% në vit pas moshës 30-vjeçare. Kjo rënie është aq e lehtë, sa një burrë 65-vjeçar mund të ketë fare lehtë nivele testosteroni që do ta bënin ziliqar një 35-vjeçar." Megjithatë, mjeku thotë se simptomat e raportuara mund të lidhen me hipogonadizmin. Sipas Shërbimit Shëndetësor Kombëtar britanik (NHS), hipogonadizmi është një gjendje në të cilën testikujt prodhojnë pak ose aspak hormone. "Sa i përket hipogonadizmit me shfaqje të vonshme, kjo diagnozë konstatohet te rreth 2% e burrave të moshës së mesme", thotë doktor Chao. "Jo te 50% e burrave… madje as te shumica e tyre." Ai thekson se simptoma të tilla si lodhja dhe ulja e dëshirës seksuale nuk duhet t’i atribuohen automatikisht testosteronit të ulët. "Ka dallim mes nivelit të ulët të testosteronit dhe identifikimit të faktorëve stresues në jetën e dikujt vetëm sepse ka arritur një moshë të caktuar. Stresi, mungesa e gjumit, efektet anësore të ilaçeve dhe sëmundjet metabolike mund të shkaktojnë simptoma të ngjashme", shpjegon ai. "Thelbi është se përdorimi i termit “menopauzë e meshkujve” pa dallim bie ndesh me qëllimin e kërkimit të përgjigjeve për probleme reale shëndetësore.Burrat nuk përjetojnë menopauzë." /SF Weekly– Syri.net
