Meghan Markle ka reaguar pas raportimeve se babai i saj, Thomas Markle Sr., 82 vjeç, po hetohet në Filipine për dyshime lidhur me posedimin e materialeve që paraqesin abuzim seksual me fëmijë.
Sipas raportimeve, hetimi në Cebu nisi pasi djali i tij, Thomas Markle Jr., pretendoi se kishte zbuluar imazhe të tilla në pajisjet elektronike të të atit. Deri më tani, Thomas Markle Sr. nuk është akuzuar zyrtarisht, ndërsa autoritetet filipinase nuk kanë komentuar publikisht pretendimet.
Në një deklaratë të publikuar të premten, Dukesha e Sussex-it u shpreh se ishte “thellësisht e tronditur” nga lajmi, duke shtuar se mendimet e saj janë me çdo fëmijë që mund të jetë dëmtuar.
Meghan zbuloi gjithashtu se në vitin 2018 ishte informuar për akuza të tjera shqetësuese ndaj të atit, përmes një letre drejtuar Policisë Metropolitane të Londrës dhe njësisë përgjegjëse për mbrojtjen e familjes mbretërore. Sipas saj, në atë kohë ishte siguruar se pretendimet po hetoheshin.
Ajo theksoi se vendimi për t’u distancuar nga babai i saj dhe për të mos lejuar kontaktin e tij me fëmijët, Princin Archie dhe Princeshën Lilibet, kishte si qëllim mbrojtjen e tyre.
“Shpresoj që tani të kuptohet se, pavarësisht shtrembërimeve të bëra ndër vite nga disa media, distancimi im nga babai dhe vendimi për të mos e lejuar të ketë kontakt me fëmijët tanë kishin vetëm një arsye: t’i mbroja ata”, u shpreh Meghan.
Dukesha shtoi se shpreson që drejtësia të vihet në vend dhe se siguria e fëmijëve duhet të jetë përparësia kryesore.
Marrëdhënia mes Meghan dhe të atit është e ndërprerë që prej vitit 2018, kur ajo u martua me Princin Harry. Thomas Markle nuk i ka takuar asnjëherë nipin dhe mbesën e tij.
Vitet e fundit, ai ka pasur probleme të rënda shëndetësore, përfshirë dy atake në zemër, një goditje në tru në vitin 2022 dhe amputimin e këmbës poshtë gjurit vitin e kaluar, pas një mpiksjeje të rëndë gjaku.
Pavarësisht marrëdhënies së prishur, Thomas Markle ka bërë vazhdimisht thirrje publike për pajtim me të bijën. Vitin e kaluar, ai u shpreh se nuk dëshironte të vdiste pa pasur mundësinë të rivendoste marrëdhënien me të.