Aktorja amerikane Megan Fox ka nisur një projekt të ri në internet, duke hapur një platformë me abonim ku fansat mund të kenë akses në fotografi, video dhe përmbajtje ekskluzive. Por interesi i lartë i përdoruesve duket se ka shkaktuar probleme teknike që në orët e para të lançimit.
Lajmi u bë publik të premten, më 9 tetor, kur aktorja ndau në Instagram një video ku shfaqej e veshur me të brendshme, duke paralajmëruar më pas hapjen e platformës së re. Përmes saj, ndjekësit mund të abonohen për të parë materiale që nuk do të publikohen në rrjetet e tjera sociale, si dhe të kenë mundësinë t’i dërgojnë mesazhe drejtpërdrejt aktores.
Pak kohë pas publikimit të linkut, Fox njoftoi se faqja kishte dalë përkohësisht jashtë funksionit për shkak të numrit të lartë të vizitorëve. “Vazhdoni ta rrëzoni faqen”, shkroi ajo në një reagim në Instagram, duke bërë të ditur se ekipi teknik po punonte për rikthimin e saj në funksion.
Sipas raportimit të Page Six, abonimi në platformë kushton 19,99 dollarë në muaj, ndërsa përmbajtjet individuale me pagesë variojnë nga 18 deri në 88 dollarë.
Projekti është zhvilluar në bashkëpunim me Tim Stokely, bashkëthemeluesin e platformës OnlyFans. Megan Fox nuk është vetëm një nga emrat që do të publikojnë përmbajtje në këtë hapësirë, por edhe bashkëpronare e saj, duke marrë pjesë në zhvillimin e biznesit.
Duke folur për këtë sipërmarrje, aktorja ka theksuar rëndësinë që gratë të kenë më shumë kontroll mbi imazhin e tyre, audiencën dhe platformat ku zgjedhin të publikojnë përmbajtje.
Hapja e faqes shënon një tjetër hap të aktores drejt krijimit të një marrëdhënieje më të drejtpërdrejtë me fansat, ndërsa reagimi i menjëhershëm i publikut e ka kthyer projektin në një nga temat e diskutuara të ditëve të fundit në mediat rozë.
Burimi: Page Six