I riu që u dhunua nga efektivët e Policisë gjatë tubimit të sotëm në Tiranë nuk ishte pjesë e protestës, por kalimtar. Gazetarja e Top Channel, Alma Demiraj, ka mësuar se 19-vjeçari Ledjon Balla nuk ishte në protestë, por ndodhej në një lokal. Pasi është larguar nga lokali, ai është përfshirë në turmën e protestuesve, ku më pas, sipas raportimeve, policia e ka marrë dhe e ka dhunuar. Të riut nga Librazhdi, si pasojë e dhunës, i është thyer këmba dhe ai ndodhet në Spitalin e Traumës.
Shefi i Urgjencës në Spitalin e Traumës tha se, mes të lënduarve, gjendja e tij është më e rëndë dhe se pritet t’i nënshtrohet të gjitha trajtimeve mjekësore sipas protokollit. Top Channel