Zjarret masive që kanë përfshirë Spanjën kanë rikthyer debatin për ndryshimet klimatike, ndërsa kryeministri Pedro Sánchez deklaron se kriza klimatike po shkakton pasoja të drejtpërdrejta te njerëzit dhe mjedisi. “Ndryshimi klimatik vret”, është mesazhi i përsëritur nga Sánchez, i cili këtë javë paralajmëroi se Spanja duhet të përballet jo vetëm me pasojat e katastrofave natyrore, por edhe me shkaqet që i nxisin ato.
Deklarata e kryeministrit vjen në një kohë kur zjarret kanë përfshirë zona të ndryshme të vendit, duke djegur më shumë se 180 mijë hektarë tokë gjatë shtatë muajve të parë të vitit.
Sánchez ka kërkuar masa më të forta për përballimin e emergjencës klimatike, duke theksuar se Spanja, si një nga vendet evropiane më të prekura nga ngrohja globale, po përballet me thatësira, temperatura ekstreme, përmbytje dhe zjarre gjithnjë e më të shpeshta.
Por qëndrimi i qeverisë është kundërshtuar nga partitë opozitare. Partia Popullore dhe forca e djathtë Vox kanë akuzuar kabinetin Sánchez se po përdor krizën klimatike për të justifikuar dështimet në menaxhimin e emergjencave.
Ekspertët e klimës thonë se zjarret janë rezultat i kombinimit të disa faktorëve, mes tyre temperaturat e larta, thatësira, braktisja e zonave rurale dhe rritja e bimësisë së thatë që favorizon përhapjen e flakëve.
Ndërkohë, autoritetet meteorologjike spanjolle kanë kundërshtuar pretendimet që mohojnë ndryshimet klimatike, duke deklaruar se të dhënat tregojnë se valët e të nxehtit janë bërë më të shpeshta dhe më intensive vitet e fundit. Top Channel