Luigi Mangione, 28 vjeç, është deklaruar fajtor për akuzat federale lidhur me vrasjen e Brian Thompson, CEO i UnitedHealthcare, i cili u qëllua për vdekje në Manhattan më 4 dhjetor 2024.
Në një seancë të tensionuar në gjykatën federale të Nju Jorkut, Mangione pranoi para gjykatësit se ishte ai që qëlloi Thompsonin. “Unë qëllova zotin Thompson në Manhattan dhe ai vdiq”, tha ai, ndërsa foli me zë të qetë dhe pa shfaqur shumë emocione.
Mangione pranoi gjithashtu se sulmi ishte planifikuar me kujdes dhe se kishte përdorur një armë të printuar në 3D. Ai tha se kishte vepruar pas viteve të vuajtjeve nga dhimbje të forta të shpinës dhe për shkak të pakënaqësisë së tij me sistemin e sigurimeve shëndetësore.
Brian Thompson, 50 vjeç dhe baba i dy fëmijëve, u qëllua në shpinë teksa po largohej nga një hotel në Manhattan. Familja e tij, e cila ishte e pranishme në gjykatë, kërkoi që dënimi të pasqyrojë rëndësinë dhe brutalitetin e krimit.
Prokurorët federalë kanë deklaruar se do të kërkojnë burgim të përjetshëm për Mangionen. Dënimi është caktuar të shpallet më 18 dhjetor. Kur gjykatësi e pyeti nëse e kuptonte se mund të kalonte pjesën tjetër të jetës në burg, Mangione u përgjigj shkurt: “Po”.
Pas pranimit të fajësisë, avokatët e tij kërkuan që çështja e veçantë për vrasje, që vazhdon në gjykatën e shtetit të Nju Jorkut, të rrëzohet. Mbrojtja argumenton se Mangione nuk mund të gjykohet dy herë për të njëjtin krim, duke iu referuar parimit kushtetues të “rrezikut të dyfishtë” (double jeopardy).
Avokatët pretendojnë se mbajtja e procesit shtetëror do ta ekspozonte Mangionen ndaj një dënimi të dytë për të njëjtën vrasje. Megjithatë, prokuroria shtetërore pritet të kundërshtojë këtë kërkesë.
Mangione u arrestua pesë ditë pas vrasjes, pasi u identifikua në një restorant McDonald's në Altoona të Pensilvanisë, rreth 370 kilometra larg Manhatanit. Ai ishte i diplomuar në Universitetin e Pensilvanisë dhe vinte nga një familje e pasur në Maryland.
Çështja ka tërhequr vëmendje të madhe publike, ndërsa prokurorët kanë theksuar se pakënaqësia ndaj industrisë së sigurimeve shëndetësore nuk mund të justifikojë përdorimin e dhunës. Tashmë, beteja kryesore ligjore pritet të përqendrohet te dënimi i Mangiones dhe te kërkesa e mbrojtjes për rrëzimin e procesit gjyqësor në shtetin e Nju Jorkut.